Azərbaycan millisi UEFA Millətlər Liqasının V turunda noyabrın 16-da Estoniya ilə qarşılaşacaq.
“FutbolPress“in məlumatına görə, yığma buna qədər bu rəqiblər 11 dəfə üz-üzə gəlib. Görüşlərin 8-i yoldaşlıq, 3-ü isə rəsmi matçlara təsadüf edib.
Duellərdə üstünlük estonlardadır. Azərbaycan yığması duellərin 4-də uduzub, 5-də heç-heçə edib. 2 görüş isə millimizin qələbəsiylə başa çatıb. Komandalar arasındakı son beş matçda hərəyə 2 qələbə qazanılıb, 1 matç isə “sülh”lə başa çatıb.
Azərbaycan yığması UEFA Millətlər Liqasında bu mövsüm Estoniya səfərindən məğlub ayrılıb. Ötən ay Tallində baş tutan qarşılaşmada millisi 1:3 hesablı məğlubiyyətə üzülüb.
Ümumiyyətlə, Azərbaycan yığmasının ev sahibi qismində keçirilən 3 matçda estonlar qələbə qazana bilməyib. Milli 1 dəfə meydanı sevinclə tərk edib, 2 görüşdə isə bərabərlik qeydə alınıb.
Noyabrın 16-da Qəbələ şəhər stadionunda baş tutacaq Azərbaycan – Estoniya oyununa 18:00-da start veriləcək.
Azərbaycan millisi C Liqasının 1-ci qrupunda Estoniya ilə yanaşı, İsveç və Slovakiya ilə də mübarizə aparır. 4 turdan sonra aktivində xal olmayan yığma sonuncu sıradadır. Estoniya isə 3 xalla 3-cüdür.
Kamil Əhməd
