“Bayern”in alman yarımmüdafiəçisi Yozua Kimmix Münhen klubu ilə cari ilin sentyabrında müqaviləsinin yenilənməsi haqda qərardan söhbət açıb.
Arena.az “Bayern & Germany” dərgisinə istinadən məlumat verir ki, Kimmix bu qərarını karyerasındakı ən vacib qərar olaraq qiymətləndirib:
“Mən klubla əlaqədəyəm. 8-10 həftə əvvəl vəziyyətimin necə olduğunu hamımız bilirik. Bircə duyğu baş qaldırırdı: “Kimmix nəhayət nə vaxt gedəcək?”. İndi hər şey yenidən fərqlidir. Bu, mənim karyeramda çox vacib qərardır. Bunun yaxşıca düşünülməsi gərəkdir. Əlbəttə, keçmişin də öz rolu var. Həm də gələcəyin”, deyə Kimmix vurğulayıb.
Xatırladaq ki, 2024-cü ilin sentyabrında Kimmix “Bayern”lə müqaviləsinin müddətini 2025-ci ilin iyun ayının sonuna qədər uzatmağa razılaşıb.
Yozua Kimmix “Bayern”ə 2015-ci ilin iyulunda 8,5 milyon avro məbləğ müqabilində “Ştutqart”dan keçib.
Kimmix cari mövsümdə münhenlilərin heyətində 16 oyuna çıxıb, 4 məhsuldar ötürmə ilə yadda qalıb.
Kimmixin “Bayern”in heyətində çıxışının ümumi mənzərəsi isə belədir: 406 oyun, 42 qol, 108 məhsuldar ötürmə.
Yozua Kimmix 2016-cı ilin mayında debüt etdiyi Almaniya yığmasının heyətində 95 oyuna 7 qol və 21 məhsuldar ötürmə ilə fərqlənib. Kimmix bundestimlə 2017-ci il FIFA Konfederasiyalar Kubokunu qazanıb. Həmçinin Yozua Almaniyanın U-19 yığması ilə Avropa çempionatının qalibi olub.
Kimmix “Bayern”in heyətində 8 dəfə Almaniya Bundesliqasının, 3 dəfə Almaniya Kubokunun, 6 dəfə Almaniya Super Kubokunun və hərəsi 1 dəfə olmaqla UEFA Çempionlar Liqasının, UEFA Super Kubokunun, FIFA Klub Dünya Kubokunun qalibi olub.
“Transfermarkt” internet-portalı 29 yaşlı alman futbolçunun transfer dəyərini 50 milyon avro məbləğində qiymətləndirir.
Əlavə edək ki, Kimmix bir çox aparıcı Avropa klublarının, xüsusilə “Barseona”nın maraq dairəsindədir.
