İtaliyanın “Yuventus” komandasının sol cinah müdafiəçisi Xuan Kabal zədə səbəbindən 2024/2025-ci illər mövsümünü erkən başa vurub.
Arena.az xəbər verir ki, bu barədə Turin klubunun mətbuat xidməti məlumat yayıb.
Müayinə zamanı kolumbiyalı futbolçunun çarpaz bağlarında yırtıq aşkarlanıb. Bu üzdən də onun cari mövsümün sonunadək meydana çıxması gözlənilmir.
“Yuventus” Xuan Kabalı bu ilin iyul ayında İtaliyanın “Verona” klubundan 12,8 milyon avroya transfer edib. 23 yaşlı futbolçunun Turin klubu ilə 2029-cu ilin 30 iyununa qədər müqaviləsi var. O, “Yuventus”un heyətində 9 oyuna çıxıb, 1 məhsuldar ötürmə verib.
Xuan Kabal Kolumbiyanın “Atletiko Nasyonal” klubunun yetirməsidir. O, İtaliyada “Verona”nın da şərəfini qoruyub.
Kolumbiyanın U-18 yığmasında 1 oyun keçirmiş Kabal bu ildən ölkəsinin yığmasında çıxış edir. O, millidə 2 oyuna çıxıb, məhsuldar ötürmə ilə fərqlənməyib.
“Transfermarkt” internet-portalı 23 yaşlı müdafiəçinin transfer dəyərini 9 milyon avro məbləğində qiymətləndirir.
