“Mançester Yunayted”i müvəqqəti çalışdırmış Rud van Nistelroy bir gün “qırmızı şeytanlar”ın düşərgəsinə qayıdacağına söz verib.
Arena.az bu barədə “The Sun” nəşrinə istinadən məlumat verir.
Mənbənin məlumatına görə, niderlandlı mütəxəssis komandadan ayrılmazdan əvvəl futbolçularla danışıb, onlara oyunlarına görə təşəkkür edib, həmçinin yeni baş məşqçinin rəhbərliyi altında bütün bacarıqlarını kişi kimi ortaya qoymalarını tələb edib.
Xatırladaq ki, Rud van Nistelroy həmyerlisi, onu kluba gətirmiş niderlandlı mütəxəssis Erik ten Haqın istefaya göndərilməsindən sonra, “Mançester Yunayted”in müvəqqəti çalışdırıcı kimi fəaliyyət göstərib. Van Nistelroy “Mançester Yunayted”i 4 oyuna çıxarıb, 3 qələbə qazandırıb və 1 heç-heçə edib. Topların fərqi isə 11:3 nisbətindədir.
Vurğulanır ki, “Mançester Yunayted” futbolçuları van Nistelroyun işindən razı qalıb, niderlandlı mütəxəssisin onlara təsirini “əla” qiymətləndiriblər. Həmçinin klub rəhbərliyinin də Van Nistelroyun fəaliyyətindən məmnun qaldığı bildirilir.
Xatırladaq ki, “qırmızı şeytanlar”ın sükanı arxasına portuqal mütəxəssis Ruben Amorim gətirilib və yeni baş məşqçi noyabrın 11-də rəsmən fəaliyyətinə başlayıb.
