Növbəti ildə işğaldan azad olunmuş ərazilərin yenidən qurulması və bərpası üçün cari ilin ilkin proqnozundan çox, yenidən baxılmış göstəricisindən isə az vəsait nəzərdə tutulmuşdur.
Azərbaycan Respublikasının 2025-ci il dövlət büdcəsinin layihəsinə Azərbaycan Respublikası Hesablama Palatasının Rəyində bildirilib.
Qeyd edilib ki, işğaldan azad olunmuş ərazilərin yenidən qurulması və bərpası üçün 2025-ci ildə 4 milyard manat vəsaitin ayrılması nəzərdə tutulmuşdur ki, bu da 2024-cü ilin ilkin təsdiq edilmiş proqnozundan 175 milyon manat və ya 4,6% çox, yenidən baxılmış göstəricisindən isə 855,8 milyon manat və ya 17,6% azdır.
"2025-ci ildə işğaldan azad olunmuş ərazilərin yenidən qurulması və bərpası üçün əvvəlki ilə nisbətən azalma ilə vəsaitin nəzərdə tutulması “Azərbaycan Respublikasının işğaldan azad edilmiş ərazilərinə Böyük Qayıdışa dair I Dövlət Proqramı”nda nəzərdə tutulmuş tədbirlərin icra müddətinin uzadılması ilə nəticələnə bilər",- Rəydə deyilir.
2024-cü ilin 8 ayında işğaldan azad olunmuş ərazilərin yenidən qurulması və bərpası xərcləri üzrə müvafiq sifarişlər əsasında 2 milyard 933,2 milyon manat məbləğində icra edilmişdir ki, bu da həmin məqsəd üçün nəzərdə tutulmuş illik xərclərin 60,4%-nə bərabərdir. Bu da dövlət büdcəsi xərclərinin 2024-cü ilin rüblük və aylar üzrə bölgüsünə əsasən 2024-cü ilin ilk 8 ayı ərzində icra edilmiş vəsaitə nisbətən 4,1 faiz bəndi çoxdur.
Qeyd edilib ki, Hesablama Palatası tərəfindən aparılan auditlər və təhlillər işğaldan azad olunmuş ərazilərdə mümkün bəzi layihələrin (ticarət binası, market binaları və s.) qeyri-büdcə təşkilatlarının vəsaitləri hesabına həyata keçirilməsinin, habelə şəhər və kəndlərin yenidən qurulması və bərpası, müasir infrastrukturların yaradılması istiqamətində görülən işlərin maliyyələşdirilməsi üçün ayrılan xərclər üzrə optimallaşdırma işlərinin aparılmasının dövlət büdcəsinin vəsaitləri üzrə qənaətlilik prinsiplərinə əməl olunması ilə nəticələnəcəyini deməyə imkan verir.
Hesablama Palatasına işğaldan azad olunmuş ərazilərin yenidən qurulması və bərpası ilə bağlı icraçı qurumlar tərəfindən təqdim edilmiş məlumatların təhlili ilə bəzi layihələr üzrə əvvəlki illərdən iri məbləğdə qalıq dəyərin sifarişçinin (dövlət mülkiyyətli hüquqi şəxsin) əsas fəaliyyətdən əldə etdikləri gəlirlər hesabına davam etdirildiyi müşahidə edilmişdir ki, bu hal investisiya yönümlülük və qənaətlilik aspektindən müsbət hal kimi qiymətləndirilir. Bu kimi halların kommersiya prinsipi ilə fəaliyyət göstərən sifarişçilər tərəfindən bir sıra layihələrə də şamil edilməsinin büdcə vəsaitinə qənaətlə yanaşı, layihələrin vaxtında icrasının başa çatdırılmasına müsbət töhfə verəcəyi qənaətindəyik.
