Avstraliya hakimiyyət orqanları AUKUS (Avstraliya, Böyük Britaniya və ABŞ-ın üçtərəfli hərbi ittifaqı) tərəfdaşlıq sazişlərinin həyata keçirilməsi fonunda nüvə sualtı təlim proqramının başlandığını elan edib.Ölkənin baş naziri Entoni Albanesenin sözlərinə görə, ilk mərhələdə Avstraliya universitetlərinin 200 hərbi qulluqçusu və məzunu təlim və təkmilləşdirmə proqramında iştirak edəcək. “Bu təşəbbüs yaxın iki il ərzində nüvə sualtı qayıqlarını idarə etmək və onlara texniki xidmət göstərmək üçün lazım olan fənlər və peşələr üzrə 200 nəfərə təlim keçməyə imkan verəcək”, - deyə baş nazirin mətbuat xidmətinin yaydığı bəyanatda bildirilib.Hökumət başçısı həmçinin qeyd edib ki, kadr hazırlığı və yenidənhazırlanma proqramının ilkin mərhələsində sənaye istehsalı və emalı, layihələrin idarə edilməsi və logistika prioritet istiqamətlər olacaq. Bəyanatda qeyd edilir ki, hakimiyyət sualtı qayıqların istismarı, təmiri və sonra istehsalı ilə bağlı obyektlərdə işləmək üçün kritik bacarıqlara və karyeralarını yüksəltmək qabiliyyətinə malik dəyərli işçiləri cəlb etmək niyyətindədir. 2040-cı ilə qədər bu və digər təhsil proqramları çərçivəsində ölkədə nüvə sualtı donanmasının tikintisi və istismarı ilə bağlı obyektlərdə 20 mindən çox yüksək ixtisaslı işçinin çalışacağı gözlənilir.
