2024-cü tədris ili Azərbaycanda təhsildə bərabərsizlik məsələsinin daha çox diqqət mərkəzində olduğu bir dönəmi təmsil edir.
Bu barədə Fins.az-a danışan təhsil eksperti Vəfa Musayeva, şəhər və kənd məktəbləri arasında mövcud olan fərqləri geniş şəkildə açıqlayaraq bu problemin cəmiyyət və dövlət üçün əhəmiyyətini vurğulayıb.
Onun sözlərinə görə, şəhər məktəblərində müasir texnologiyaların, əlavə dərnəklərin və xarici dil dərslərinin mövcudluğu kənd məktəbləri ilə müqayisədə əhəmiyyətli dərəcədə yüksəkdir:
“Şəhər məktəbləri şagirdlərə daha çox imkan təqdim edir ki, bu da onların gələcəkdə uğurlu karyera qurma şanslarını artırır. Kənd məktəblərində isə resurs çatışmazlığı, müəllim qıtlığı və bəzən qeyri-kafi infrastruktur kimi problemlər mövcuddur. Bu, kənddəki uşaqların təhsil baxımından geri qalmasına və sosial-iqtisadi cəhətdən arxada qalmasına səbəb olur. Təhsildəki bu bərabərsizlik cəmiyyətdə sosial fərqləri daha da artırır. Şəhər məktəblərində təhsil alan uşaqlar daha yaxşı imkanlarla təchiz olunarkən, kənddəki uşaqlar bu imkanlardan məhrum qalır. Bu fərqlilik, gələcəkdə sosial və iqtisadi bərabərsizliklərin dərinləşməsinə səbəb ola bilər. Bu problemi həll etmək üçün dövlət, yerli icmalar və qeyri-hökumət təşkilatlarının kənd məktəblərinə daha çox diqqət yetirməsi vacibdir. Resursların bərabər paylanması və kənd məktəblərinin inkişaf etdirilməsi üçün müvafiq tədbirlər görülməlidir".
V.Musayeva tövsiyə edir ki, valideynlərin və yerli icmaların da bu prosesdə fəal rol oynayaraq hər bir uşağın keyfiyyətli təhsil almasına dəstək olmalıdırlar:
“Builki tədris ilində təhsildəki bərabərsizliyin aradan qaldırılması məqsədilə atılacaq addımlar, gələcək nəsillər üçün daha yaxşı imkanlar yaradacaq. Cəmiyyətin hər bir üzvü, dövlət qurumları və qeyri-hökumət təşkilatları birgə çalışaraq təhsil sahəsindəki bu fərqlilikləri minimuma endirmək və hər bir uşağa bərabər təhsil imkanları təqdim etmək üçün səy göstərməlidir. Bu yanaşma, Azərbaycanın təhsil sisteminin daha ədalətli və inklüziv bir şəkildə inkişaf etməsinə şərait yaradacaq”.
Fuad Mədətov
Fins.az
