NATO-nun baş katibi Yens Stoltenberq Vladimir Putinin Qərb silahları ilə Rusiyanın dərinliklərinə endirilən zərbələrin "qırmızı xətt"ə çevrilə biləcəyinə, bundan sonra alyansın Rusiya Federasiyası ilə müharibə vəziyyətinə düşəcəyinə dair bəyanatlarına şübhə ilə yanaşıb. Stoltenberq Rusiya prezidentinin bir çox digər təhdidləri kimi bunu da feyk adlandırıb.
Qaynarinfo xəbər verir ki, NATO-nun baş katibi bu barədə "The Times” qəzetinə müsahibəsində danışıb.
O xatırladıb ki, Putin əvvəllər "qırmızı xətlər” haqqında bir neçə dəfə danışıb, lakin onlar keçdikdən sonra Moskvadan heç bir reaksiya olmayıb. "O, bunu etməyə cəsarət etmədi, çünki başa düşür ki, NATO dünyanın ən güclü hərbi ittifaqıdır. Bundan əlavə, Rusiya anlayır ki, nüvə müharibəsində qalib gəlmək mümkün deyil və belə müharibədə iştirak qəbuledilməzdir. Biz bunu dəfələrlə Putinə çatdırmışıq", deyə Stoltenberq vurğulayıb.
NATO-nun baş katibi qeyd edib ki, Putin hazırda Rusiya, Çin, İran və Şimali Koreya kimi avtoritar dövlətləri Ukrayna müharibəsi ətrafında birləşdirməyə çalışır, lakin Moskva getdikcə Pekindən asılı vəziyyətə düşür. Sözügedən ölkələrin alyansında aparıcı rolu Kremlin əsas dəstəkçisi olan Çin oynayır. O xatırladıb ki, məhz Çin Rusiya hərbi iqtisadiyyatını, o cümlədən Ukraynada istifadə olunan raket və bombaların istehsalı üçün istifadə olunan mikroelektronika və mikroprosessorları tədarük etməklə fəal şəkildə dəstək verir.
Stoltenberq əlavə edib ki, Rusiya Çinin köməyi müqabilində onunla texnologiya paylaşır, lakin konkret olaraq söhbət hansı texnologiyalardan getdiyini açıqlamayıb.
Baş katib həmçinin Qərb silahları ilə Rusiyanın dərinliklərinə zərbələrin endirilməsinin tərəfdarı olan Böyük Britaniya və Fransanın mövqeyini dəstəkləyib. "NATO müttəfiqləri Rusiya ərazisində qanuni hədəflərə qarşı silah istifadəsinə icazə verərsə, münaqişənin tərəfi olacaqlarını söyləmək düzgün deyil. Şimali Koreya və İran münaqişənin birbaşa tərəfi olmadan Rusiyaya əhəmiyyətli hərbi dəstək verir və raket və pilotsuz uçuş aparatları ötürür", deyə o izah edib.
Sentyabrın 12-də Putin bildirib ki, Qərbin uzaqmənzilli silahları ilə Rusiya ərazisinin dərinliklərinə raket zərbələrinin endirilməsi NATO və ABŞ-ın Rusiyaya qarşı müharibəsi demək olacaq. Vəziyyətlə tanış olan "The Times” mənbələri iddia edir ki, Vaşinqton Ukraynaya bu cür hücumlar üçün Amerikanın ATACMS raketlərindən istifadə etməyə icazə vermək fikrində deyil.
Eyni zamanda, sentyabrın 22-23-də Nyu-Yorkda keçiriləcək BMT Baş Assambleyasında ABŞ-ın Rusiya Federasiyasının dərinliklərinə zərbələr endirmək üçün uzaqmənzilli Britaniya raketlərinin istifadəsinə razılıq verəcəyi gözlənilir.
Nizami Bağırov
