Rumıniya öz ərazisində Ukrayna dəniz piyadalarının hazırlanması üçün təlim mərkəzi yaratmaq istəyir.
NOCOMMENT.az xəbər verir ki, Euractiv-in məlumatına görə, Rumıniya prezidenti Klaus İohannis parlamentə ünvanladığı məktubda Ukrayna silahlı qüvvələrinin hazırlığının intensivləşdirilməsi və şaxələndirilməsinin zəruriliyini qeyd edib və belə bir təlim mərkəzinin yaradılması üçün parlamentdən razılıq istəyib.
Qeyd olunur ki, bu təklif 57 ölkənin və Ukraynaya dəstək verən Avropa İttifaqının alyansı olan Ukraynanın Müdafiəsi üzrə Təmas Qrupu çərçivəsində irəli sürülüb.
“Rumıniya bu dəniz təlim mərkəzinə ev sahibliyi edəcək və mövcud imkanlar daxilində Ukrayna dəniz piyadalarının təliminə dəstək verəcək. Beynəlxalq töhfələr mərkəzin fəaliyyətini dəstəkləyəcək, Böyük Britaniya isə onun ilkin inkişafı üçün tam maliyyə və planlaşdırma dəstəyi verəcək”, – məqalədə deyilir.
Qeyd olunur ki, mərkəz tərəfdaş hərbi tərəflər tərəfindən əvvəlcədən razılaşdırıldıqdan sonra iki il fəaliyyət göstərəcək. Bununla belə, Rumıniya təhsil prosesi zamanı və ya razılaşdırılmış müddətin sonunda istənilən vaxt öhdəliklərdən imtina etmək hüququnu özündə saxlayır.
