Mərkəzi Seçki Komissiyasının səslərin 100%-ni emal etdikdən sonra dərc etdiyi ilkin nəticələrə görə, prezident seçkilərinin ikinci turunda Moldovanın hazırkı prezidenti Maia Sandu 55,33% səslə qalib gəlib, keçmiş baş prokuror Aleksandr Stoyanoqlo isə 44,67% səs toplayıb.
Moldovada və xaricdə ümumilikdə 1 milyon 699 min 25 nəfər seçki məntəqələrinə gəlib ki, bu da seçici siyahılarına daxil edilmiş şəxslərin 54,31 faizindən çoxdur. 2020-ci il prezident seçkilərinin ikinci turunda bu rəqəm 58,22%-ə çatıb.
Eyni zamanda, bu dəfə xaricdə keçirilən seçkilərdə 328 min 855 seçici iştirak edib ki, bu da ölkə üçün mütləq rekorda çevrilib.
