UEFA Çempionlar Liqasında “Mançester Siti”yə qarşı ev oyunu Lissabon “Sportinq”inin hücumçusu Viktor Dyökereş üçün əlamətdar olub.
Arena.az məlumat verir ki, isveçli futbolçu “Joze Alvalade”də “şirlər”in “şəhərlilər” üzərində 4:1 hesablı qələbəsinə 3 qol vurmaqla töhfəsini verib.
Bununla da isveçli hücumçu 3 rekorda əl qoymuş olub.
Əvvəla, Dyökereş Avropanın ən mötəbər klub yarışının tarixində “Sportinq”in 1982-ci ildən bəri 3 qol vurmuş ilk futbolçusu olub. Dyökereşə qədər, Avropa Çempionlar Kuboku yarışının 1982-ci il mövsümündə “şirlər”in portuqal yarımmüdafiəçisi Antonio Oliveyra Zaqreb “Dinamo”sunun qapısına 3 qol vurmuşdu.
Dyökereş “Mançester Siti”nin qapısına het-triki sayəsində, Çempionlar Liqasında bir oyunda 3 qol vurmuş ikinci isveçli futbolçu ünvanına sahib olub. Dyökereşə qədər müvafiq nailiyyətə İsveç futbolunun əfsanəsi, keçmiş hücumçu Zlatan İbrahimoviç müvəffəq olmuşdu. “İbra” 2013-cü ildə “Anderlext”lə oyunda (5:0) PSJ-nin 4 qoluna imza atmışdı.
Daha öncə bunu Messi ilə Nkunku bacarmışdılar
Və ən nəhayət, Dyökereş Çempionlar Liqasında “Mançester Siti”nin qapısına 3 dəfə yol tapmış 3-cü futbolçu olub. Dyökereşə qədər “şəhərlilər”lə oyunda het-trikə 2016-cı ildə “Barselona”da çıxış etmiş argentinalı ulduz hücumçu Lionel Messi və 2021-ci ildə “Leypsiq”in fransalı yarımmüdafiəçisi Kristofer Nkunku müvəffəq olublar.
Mərkəz hücumçusu Viktor Dyökereş futbola “İFK Aspudden-Tellus” klubunda qədəm qoyub. Buradan “Brommapoykarna”ya keçmiş Dyökereş böyük futbolda debüt edib. Hücumçu karyerası ərzində “Brayton”, “Sankt-Pauli”, “Suonsi Siti” və “Koventri Siti”də çıxış edib.
2023-cü ilin iyulunda Lissabon “Sportinq”i Dyökreşi 24 milyon avro məbləğ müqabilində öz düşərgəsinə qatıb. İsveçli hücumçunun “şirlər”lə müqaviləsinin müddəti 2028-ci ilin iyun ayının sonuna qədər qüvvədədir.
Cari mövsümdə Dyökereş “Sportinq” üçün bütün yarışlarda 17 oyuna çıxıb, 23 qol vurub, 4 məhsuldar ötürmə verib.
İsveçli hücumçunun “şirlər”in heyətində çıxışının ümumi mənzərəsi 67 oyun, 66 qol və 19 məhsuldar ötürmədən ibarətdir.
Hazırda Dyökereş cari mövsüm Portuqaliya Premyer Liqasının 16 qolla ən sərrast futbolçusudur.
Viktor Dyökereş 2019-cu ilin yanvarında debüt etdiyi İsveç yığmasının heyətində 24 oyun keçirib, 10 qol vurub, 5 məhsuldar ötürmə verib.
Viktor Dyökereşin qənimətlər muzeyində “Sportinq”lə qazandığı Portuqaliya çempionluğu (2023/2024) var. Fərdi uğurlara gəlincə, Dyökereş 29 qolla 2023/2024-cü illər Portuqaliya Premyer Liqasının ən sərrast qolçusu olub.
“Transfermarkt” internet-portalı 26 yaşlı isveçli mərkəz hücumçusu Viktor Dyökereşin transfer dəyərini 70 milyon avro məbləğində qiymətləndirir.
Əlavə edək qolçu hücumçu bir çox Avropa nəhənglərinin diqqət mərkəzindədir.
