Futbol üzrə Fransa yığma komandasının və Madrid “Real”ının dayaq yarımmüdafiəçisi Orelyen Tçuameni sıradan çıxıb.
Arena.az bu barədə Madrid klubunun rəsmi saytına istinadən xəbər verir.
Fransalı futbolçu UEFA Çempionlar Liqasının 4-cü turu çərçivəsində keçirilmiş “Milan”la qarşılaşmanın fasiləsində zədələnib. Oyundan sonra aparılmış müayinələr nəticəsində yarımmüdafiəçinin uzun müddət forma geyinə bilməyəcəyi bəlli olub. 24 yaşlı futbolçu ən azı 1 ay yaşıl meydanlardan uzaq qalacaq. Bu isə o deməkdir ki, Tçuameni UEFA Millətlər Liqasında Fransa yığmasının İsrail və İtaliyaya qarşı keçirəcəyi matçlarda da iştirak edə bilməyəcək.
Xatırladaq ki, Fransanın “Bordo” klubunun yetirməsi olan Orelyen Tçuameni “Real”a 2022-ci ilin iyul ayında 80 milyon avro müqabilində “Monako”dan keçib. Fransalı “dayaqçı”nın “qaymaqlılar”la müqaviləsi 2028-ci ilin iyun ayının sonuna qədər qüvvədədir.
Cari mövsümdə Tçuameni “Real”ın heəytində bütün yarışlarda 15 oyuna çıxıb, məhsuldar fəaliyyəti ilə diqqət çəkməyib. Onun “Real”ın heyətindəki ümumi statistikası isə belədir: 103 oyun, 3 qol və 5 məhsuldar ötürmə.
Orelyen Tçuameni 2021-ci ilin sentyabrında debüt etdiyi Fransa yığmasının heyətində 38 oyuna 3 qol və 1 məhsuldar ötürmə ilə fərqlənib. Orelyen “xoruzlar”la 2021 UEFA Millətlər Liqasının qalibi olub.
Tçuameni “Kral klubu” ilə İspaniya La Liqasını (2023/2024), İspaniya Kubokunu (2022/2023), İspaniya Super Kubokunu (2023/2024) qazanıb, həmçinin UEFA Çempionlar Liqasının (2023/2024), UEFA Super Kubokunun (2022/2023, 2024/2025) və FIFA Klub Dünya Kubokunun (2023) qalibi olub.
“Transfermarkt” internet-portalı 24 yaşlı fransalı dayaq yarımmüdafiəçinin transfer dəyərini 100 milyon avro məbləğində qiymətləndirir.
