Azərbaycan Ordusunun Xüsusi Təyinatlı Qüvvələrinin baş leytenantı olan Baş leytenant Adil İbrahimli 2020-ci ilin 27 sentyabrında başlanan Vətən müharibəsi zamanı Murovdağın, həmçinin Cəbrayıl, Füzuli, Hadrut, Xocavənd və Şuşanın azadlığı uğrunda gedən döyüşlərdə savaşıb və noyabrın 7-də Şuşanın azad edilməsi zamanı qəhrəmancasına şəhid olub.
QHT.az xəbər verir ki, 9 sentyabr 1992-ci ildə Sumqayıt şəhərində anadan olub. 2008–2011-ci illərdə Cəmşid Naxçıvanski adına Hərbi Liseydə, 2011–2015-ci illərdə isə Heydər Əliyev adına Azərbaycan Ali Hərbi Məktəbində (AAHM) təhsil alıb. 2015–2017-ci illərdə Azərbaycan Silahlı Qüvvələrinin "N" saylı hərbi hissəsində xidmət edib. 2017-ci ildən etibarən isə Xüsusi Təyinatlı Qüvvələrin sıralarında baş kəşfiyyatçı, qrup Komandirinin müavini, qrup komandiri vəzifələrində xidmət edib.
Adil İbrahimli göstərdiyi qəhrəmanlığa görə Azərbaycan Respublikasının Prezidenti İlham Əliyevin Sərəncamına əsasən ölümündən sonra "Vətən uğrunda", "Kəlbəcərin azad olunmasına görə", "Xocavəndin azad olunmasına görə", "Şuşanın azad olunmasına görə", "Cəbrayılın azad olunmasına görə" və "Vətən Müharibəsi Qəhrəmanı" medalları ilə təltif edilib.
Ruhu şad olsun!
