Tramp Ağ Evə qayıtdıqdan sonra İrana qarşı sanksiyaları kəskin şəkildə sərtləşdirməyi və onun neft sənayesinə ciddi zərbə vurmağı planlaşdırır.
Musavat.com xəbər verir ki, bu barədə Wall Street Journal-ın məlumat yayıb.
Yada salaq ki, Donald Trampın İrana münasibəti bundan əvvəlki prezidentlik dövründə sərt və təzyiq göstərən xarakterdə idi. Tramp administrasiyası 2018-ci ildə İranla bağlanmış nüvə razılaşmasından (JCPOA) çıxıb və "maksimum təzyiq" kampaniyasını tətbiq edib. Bu kampaniya İranın iqtisadiyyatını zəiflətmək məqsədi ilə çox sayda sərt sanksiyalar tətbiq etməklə həyata keçirilib. Trampın əsas məqsədi İranın nüvə və ballistik raket proqramlarını, habelə Yaxın Şərqdə təsirini məhdudlaşdırmaq idi.
"Maksimum təzyiq" siyasətinə əsasən Tramp administrasiyası İranın neft ixracını sıfıra endirməyi və maliyyə sektoruna ciddi zərbə vurmağı hədəfləyirdi. Sitatlardan biri belədir: "Biz İranı heç bir zaman nüvə silahı istehsal edə bilməyəcəyinə əmin olmaq üçün maksimum təzyiq altında saxlayacağıq" (Tramp administrasiyasının rəsmi açıqlaması, 2018).
Bu siyasət həmçinin İslam İnqilabı Keşikçiləri Korpusunu (IRGC) terrorçu təşkilat kimi tanımaq və İranın nüfuz dairəsinə daxil olan qruplara qarşı hərbi və iqtisadi təzyiqlər tətbiq etməklə müşayiət olunurdu.
Afaq,
Musavat.com
