Dünya Bankı Rusiyaya qarşı sanksiyaların Mərkəzi Asiya ölkələrinin iqtisadiyyatında gözlənilməz artım təmin etdiyini açıqlayıb. Dünya Bankının analitiki Aleksey Morozovun açıqlamalarına görə, region ölkələri logistika, ticarət və investisiya axınını artırmaqla iqtisadi artıma nail olublar.
Hafta.az-ın yazdığına görə, Morozov bu haqda “Rossiyskaya qazeta”ya müsahibəsində belə deyib: "Mərkəzi Asiya və Qafqaz ölkələri üçün sanksiyalar paradoksal olaraq logistika, ticarət və investisiya axınının artması sayəsində mühüm iqtisadi artım amilinə çevrilib. Dünya Bankının analitikləri 2024-cü ilin sonuna qədər Mərkəzi Asiya iqtisadiyyatlarının 3,2 faiz artacağını proqnozlaşdırırlar. Bu göstərici Avropadakından daha yüksəkdir. Bu, xüsusilə 2020-ci ildə iqtisadi durğunluq və inkişaf etmiş ölkələrdə gözlənilən məhdud artımla kəskin ziddiyyət təşkil edir. ABŞ-ı çıxmaq şərtilə inkişaf etmiş ölkələrin ÜDM-i 2024-cü ilin sonuna qədər cəmi 0,9 faiz artacaq".
Dünya Bankının qiymətləndirmələrinə görə, Rusiyaya qarşı sanksiyalar Orta Asiya və Qafqaz kimi regionlarda iqtisadi artıma təkan verən amil kimi önə çıxsa da, Rusiyada dollara inamın azalması ilə dedollarizasiya prosesi sürətlənib. Rusiya bilavasitə Qərbin sanksiyalarına məruz qaldığından ticarətini diversifikasiya etmək üçün dollar və avrodan başqa valyutalara üz tutdu. Çin yuanı və rus rublu kimi valyutaların beynəlxalq əməliyyatlarda payı 2024-cü ildən etibarən artarkən, Rusiya Mərkəzi Bankının məlumatlarına görə, ikinci rübdə dollar və avronun ixrac əməliyyatlarında payı 20 faizdən aşağı düşüb, idxal əməliyyatlarında da 25 faizdən az olub.
