AMD işçi qüvvəsini təxminən 4% ixtisar edəcəyini açıqlayıb. Bu o deməkdir ki, 26.000 işçi qüvvəsindən 1000-dən az işçini ixtisar edəcək. Qərar AMD-nin x86 prosessorları bazarında "Intel"i qabaqladığı və "Nvidia" ilə rəqabət aparan süni intellekt sürətləndiricilərinin istiqamətini fəal şəkildə inkişaf etdirdiyi bir vaxtda qəbul edilib.
Valyuta.az xəbər verir ki, bu barədə "VentureBeat" məlumat yayıb.
AMD sözçüsü bildirib ki, ixtisarlar resursların optimallaşdırılması və əsas artım sahələrinə diqqətin yönəldilməsi strategiyasının bir hissəsidir. Şirkət keçid dövründə işdən çıxarılan işçiləri dəstəkləməyi öhdəsinə götürür.
Qeyd edək ki, son vaxtlar AMD səhmləri azalıb, "Nvidia" səhmləri isə əhəmiyyətli dərəcədə yüksələrək, onu dünyanın ən dəyərli birja şirkəti edib. "Nvidia"nın bazar dəyəri indi AMD-nin 227 milyard dollarına qarşı 3,64 trilyon dollardır.
Oktyabr ayında AMD bu il 5 milyard dollar dəyərində süni intellekt çipləri satmağı planlaşdırdığını açıqlayıb. Şirkət həmçinin oyun konsolları üçün CPU və GPU bazarında lider mövqeyə malikdir, baxmayaraq ki, bu bazar pandemiya və "PlayStation 5" və "Xbox Series X/S" üçün təchizat çatışmazlığı səbəbindən gözləniləndən daha zəif olub.
"Mercury Research"ə görə, AMD prosessorlarının bazar payı 34% təşkil edir ki, bu da bir neçə il əvvəllə müqayisədə xeyli yüksəkdir. Analitik Con Peddi işçilərin işdən çıxarılmasına təəccübləndiyini bildirərək, şirkətin qərar qəbul etmək üçün gözləyə biləcəyini söyləyıb.
Paşa Məmmədli
