Braziliya millisinin ulduz hücumçusu Vinisius Junior Venesuela yığmasına qarşı oyunda xoşagəlməz davaranışı ilə yadda qalıb.
Arena.az xatırladır ki, Braziliya millisi 2026-cı il dünya çempionatının CONMEBOL bölgəsi seçmə mərhələsinin 11-ci turunda Venesuela yığması ilə oyunda gözlənilməz heç-heçə oynayıb – 1:1.
“Vini” oyunda məhsuldar fəaliyyəti ilə diqqət çəkməyib, 62-ci dəqiqədə isə penaltini qaçırıb. Ardınca isə qəzəbli Vinisius hakimə kobud təhqir ünvanlayıb. Xüsusən də “Vini” ədalət təmsilçisinə təcili surətdə buradan cəhənnəmə vasil olmağı tövsiyə edib.
Əlavə edək ki, Venesuela yığması kobud oyunu və aldığı qırmızı vərəqə ilə diqqət çəkib.
Vurğulanır ki, Vinisiusun davranışı oyun protokoluna əsasən araşdırılacaq və bu barədə müvafiq ölçü götürüləcək.
11 turdan sonra Braziliya millisi 17 xalla yarış cədvəlinin 3-cü pilləsində qərarlaşıb. Venesuela yığması isə 12 xalla 7-ci pillədədir. Yarış cədvəlinə 22 xalla Argentina yığması başçılıq edir.
Xatırladaq ki, daha əvvəl Argentina yığmasının ulduz hücumçusu və kapitanı Lionel Messinin hakimi təhqir etdiyi barədə xəbər yayılmışdı.
Vinisius Junior “Flamenqo”nun yetirməsidir. Braziliyalı cinah hücumçusu “Real”a 2018-ci ilin iyul ayında 45 milyon avro məbləğ müqabilində elə, “Flamenqo”dan keçib. Vinisiusun İspaniya nəhəngi ilə müqaviləsi 2027-ci ilin iyun ayının sonuna qədər qüvvədədir.
Cari mövsümdə “Vini” madridlilərin heyətində 17 oyuna çıxıb, 12 qol və 7 məhsuldar ötürmə ilə fərqlənib. Vinisiusun “Real”da çıxışının ümumi mənzərəsi isə belədir: 281 oyun, 95 qol, 82 məhsuldar ötürmə.
“Vini” “qaymaqlılar”la İspaniya La Liqasının (2019/2020, 2021/2022, 2023/2024), İspaniya Kral Kubokunun (2022/2023), İspaniya Super Kubokunun (2019/2020, 2021/2022, 2023/2024), Çempionlar Liqasının (2021/2022, 2023/2024), UEFA Super Kubokunun (2022/2023, 2024/2025), FIFA Klub Dünya Kubokunun (2019, 2023) qalibi olub.
Vinisius Junior 2019-cu ilin sentyabrında debüt etdiyi Braziliya milli komandasının heyətində 35 oyun keçirib, 5 qol vurub və 5 məhsuldar ötürmə verib. “Vini” Braziliyanın U-15, U-17 komandaları ilə Cənubiamerikan Çempionatının qalibi olub.
“Transfermarkt” internet-portalı 24 yaşlı braziliyalı sol vingerin transfer dəyərini 200 milyon avro məbləğində qiymətləndirir. Bu məbləğ “Vini”nin dünyanın ən bahalı iki futbolçusundan biri olması deməkdir.
