Qarabağ Dirçəliş Fondunun İdarə Heyətinin sədri Rəhman Hacıyev tanınmış futbolçu Qara Qarayevlə görüşüb.
“İki sahil” xəbər verir ki, bu barədə Rəhman Hacıyev öz sosial hesabında məlumat verib.
"Bu gün mənim Azərbaycanın ən hörmətli idmançılarından biri olan Qara Qarayevlə görüşmək imkanım oldu. Onun Qarabağa olan sevgisi, nümunəvi liderliyi və nüfuzu ilə birləşərək Qarabağ Dirçəliş Fondunun fəaliyyətinə necə dəstək verə biləcəyini müzakirə etdik. Qara bəy nəzakətlə Fondun təşəbbüslərini dəstəkləmək, eləcə də keçmiş məcburi köçkünlərin Böyük Qayıdışına və işğaldan azad edilmiş torpaqlarımızın yenidən qurulmasına dəstək göstərməkdə bizə qoşulmağa razılıq verdi.
Onun şəxsi hekayəsi çox ruhlandırıcıdır – 1993-cü ildə Ermənistan silahlı qüvvələri tərəfindən işğal olunmuş və 2020-ci ildə Vətən Müharibəsi zamanı isə işğaldan azad edilmiş Horadiz kəndində anadan olan Qara məcburi köçkün kimi həyatın sınaqlarını dəf edərək Azərbaycanın ən uğurlu idmançılarından birinə çevrilib və UEFA Çempionlar Liqası futbolunu Azərbaycana gətirən əfsanəvi “Qarabağ” komandasının liderlərindən biri olmağı bacarıb.
Onun təcrübəsi hamımız üçün çox yaxşı nümunədir – əgər Qara belə maneələri dəf edə bilibsə, demək biz birlikdə doğma Qarabağın bərpası ilə bağlı daha böyük uğurlara imza atmağı bacararıq.
Onun liderlik keyfiyyətləri və nümunəvi statusu Fondun missiyası üçün məlumatlılığın artırılmasında əvəzsiz olacaq.
Mən ümumi vizyonumuza töhfə verməyə hazır olduğuna görə Qaraya minnətdarlığımı bildirirəm və Qarabağın parlaq gələcəyinin reallığa çevrilməsini təmin etmək üçün birgə işləməyi səbirsizliklə gözləyirəm.
