Respublika Sanitariya-Karantin Mərkəzində vəzifəsindən sui-istifadə edərək külli miqdarda rüvşət aldığı iddia olunan Saleh Novruzi, Yadulla Balışov və Tahir Vəliyevin məhkəməsi başlayıb.
Bizim.Media xəbər verir ki, proses Bakı Ağır Cinayətlər Məhkəməsində hakim Rasim Sadıqovun sədrliyi ilə keçirilib.
İclasda proses iştirakçıları tanıdılıb.
MÖVZU İLƏ BAĞLI:
Sanitariya-Karantin Mərkəzində KORRUPSİYA ƏMƏLİYYATI - Vəzifəli şəxslər belə SAXLANILDI – VİDEO
Dövlət ittihamçısı çıxış edərək bildirib ki, təqsirləndirilən şəxslər müxtəlif şəxslərdən külli miqdarda rüşvət alaraq ölkəyə gətirilən müxtəlif çeşiddə mallara hər hansı nümunə götürülmədən, labarotoriya müşahidəsi aparılmadan gigiyenik sertifikatların verilməsini tezləşdirilməsinə köməklik göstəriblər.
Saleh Novruzi, Yadulla Balışov və Tahir Vəliyev özünü təqsirli bilməyib. Məhkəmə onların təqsirli bilindiyi halda 20 ilə qədər cəza ala biləcəkləri barədə xəbərdar edib.
Tahir Vəliyevin vəkili Eldəniz Quliyev işə yeni qoşulduğu üçün məhkəmədən vaxt istəyib.
Bu səbəbdən iclas 8 oktyabr saat 10:50-yə təxirə salınıb.
Qeyd edək ki, bu il Baş prokuror yanında Korrupsiyaya qarşı Mübarizə Baş İdarəsi tərəfindən keçirilmiş əməliyyat-axtarış tədbirləri nəticəsində Azərbaycan Respublikası Səhiyyə Nazirliyinin Respublika Sanitariya-Karantin Mərkəzi publik hüquqi şəxsin baş direktoru Saleh Novruzi, direktor müavini Yadulla Balışov və Laboratoriya şöbəsinin müdiri Tahir Vəliyev cinayət başında yaxalanıblar.
Fakt üzrə Baş İdarədə Azərbaycan Respublikası Cinayət Məcəlləsinin müvafiq maddələri ilə cinayət işi başlanıb.
Əməliyyat-istintaq tədbirləri ilə həmin şəxslərin qabaqcadan əlbir olaraq müayinə məqsədli nümunələr götürülmədən idxal və daxili istehsal məhsullarının gigiyenik sertifikatlaşdırılması və digər bu kimi qanunsuz hərəkətləri müqabilində işlədikləri quruma müraciət etmiş ayrı-ayrı vətəndaşların külli miqdarda pul vəsaitlərini rüşvət qismində almalarına əsaslı şübhələr müəyyən edilib.
Qeyd edilən vəzifəli şəxslərin xidməti otaqlarında və digər ünvanlarda aparılmış axtarışlarla iş üzrə əhəmiyyət kəsb edən sənəd və başqa sübutlar aşkar edilərək götürülüb.
İlkin sübutlar əsasında Saleh Novruzi, Yadulla Balışov və Tahir Vəliyev şübhəli şəxs qismində tutularaq Cinayət Məcəlləsinin 311.3.1, 311.3.2, 311.3.3 (qabaqcadan əlbir olan bir qrup şəxs tərəfindən təkrar və külli miqdarda rüşvət alma) və 308.2-ci (ağır nəticələrə səbəb olan vəzifə səlahiyyətlərindən sui-istifadə) maddələri ilə təqsirləndirilən şəxs qismində cəlb edilib, hər 3 şəxsin yaşı və səhhəti nəzərə alınmaqla, barələrində istintaq orqanının vəsatəti, ibtidai araşdırmaya prosessual rəhbərliyi həyata keçirən prokurorun təqdimatı əsasında məhkəmənin qərarı ilə ev dustaqlığı (əsas) və vəzifədən kənarlaşdırma (əlavə) növündə qətimkan tədbirləri seçilib.
Selcan Zaurqızı, Bizim.Media
