1 iyul 2024-cü ildən etibarən Oxu.az mobil tətbiqinin köhnə versiyasına dəstək dayandırılacaq - yenilənmiş versiyanı endirmək üçün Google Play və ya AppStore-a keçməyiniz xahiş olunur.
Rusiya Xarici İşlər Nazirliyinin rəsmi nümayəndəsi Mariya Zaxarova Azərbaycanın Baku TV telekanalına verdiyi şərhdə Rusiya-Ermənistan münasibətlərinin hazırkı vəziyyətini və ölkələr arasında yaranan fikir ayrılıqlarının səbəblərini müzakirə edib.
Azərbaycanlı jurnalist Səbinə Dadaşovanın Rusiya ilə Ermənistan arasındakı münasibətlərdə iqtisadi və siyasi komponentlər arasında kəskin ziddiyyətin səbəbləri ilə bağlı sualına cavab olaraq, Zaxarova, ilk növbədə, statistik məlumatlardan istinad gətirib.
"Ticarət dövriyyəsinə gəldikdə isə, bu sahədə hər şey, həqiqətən, yaxşıdır. 2024-cü ilin birinci yarısında bu, 8,3 milyard dollar təşkil edib. 2023-cü ilin göstəricilərində artım olub. Bunlar stabil olaraq Ermənistan iqtisadiyyatının rekord artım templərini təmin edir.
Əslində, Ermənistan Avrasiya inteqrasiyasının əsas benefisiarıdır və 2023-cü ilin yekunlarına görə, respublikanın xarici ticarət dövriyyəsinin 37%-i məhz Avropa İqtisadi İttifaqından (Aİİ) olan tərəfdaşların payına düşüb, ittifaq dövlətinin ixracı isə 41% artıb.
Respublika rəhbərliyi yaxşı bilir ki, Ermənistanın baş nazirinin bəyanatları, xüsusən də onun sentyabrın 18-də Ermənistanın ticarət həcmini azaltmaq, Rusiya və Aİİ ilə iqtisadi əlaqələri kəsmək planlarının olmadığı barədə bəyanatı nəyin göstəricisidir", - deyə Zaxarova bildirib.
Ermənistan-Rusiya münasibətlərinin siyasi istiqamətinə gəlincə, Zaxarova təəccübünü onunla ifadə edib ki, Ermənistan üçün Kollektiv Təhlükəsizlik Müqaviləsi Təşkilatı (KTMT) və Aİİ fərqli strukturlar kimi görünür, baxmayaraq ki, onların "onurğa sütunu", əslində, eyni ölkələrdən ibarətdir.
"Bu, onu deməyə əsas verir ki, məhz Ermənistanın beynəlxalq siyasətinə Qərbdən təzyiq göstərməyə çalışırlar. Bunu Qərb ölkələrinin birbaşa sitatları sübut edir: onlar Ermənistanı hansısa başqa istiqamətə aparmalı, öz institutlarına tabe etməli, eyni zamanda, onun qarşılıqlı əlaqə imkanlarının qarşısını almalıdırlar. Və bu, Qərb siyasətçilərinin, rəsmilərinin, müxtəlif ölkələrin, blokların, birliklərin liderlərinin birbaşa çıxışlarıdır. Buna görə də görünür, elə bu, İrəvanın siyasi ritorikasında özünü göstərir", - deyə diplomat bildirib.
Zaxarovanın fikrincə, Ermənistanın kursunun iqtisadi və siyasi üst strukturlarında bu cür ziddiyyət manipulyasiya xarakteri daşıyır və bu ölkə üçün pis nəticələrə gətirib çıxara bilər.
Daha ətraflı videosüjetdə:
