Lavrov Rusiyanın Arktikada öz maraqlarını müdafiə etməyə hazır olduğunu bəyan edib

Rusiya Arktikada öz maraqlarını hərbi, siyasi və hərbi-texniki baxımdan müdafiə etməyə tam hazırdır. Bizimyol.info xəbər verir ki, bunu Rusiyanın xarici işlər naziri Sergey Lavrov “Sovet sıçrayışı” sənədli filmləri seriyasına müsahibəsində deyib. “Biz NATO-nun Arktikada mümkün böhranlarla bağlı təlimlərini necə artırdığını görürük. Ölkəmiz hərbi, siyasi və hərbi-texniki baxımdan öz maraqlarını müdafiə etməyə tam hazırdır”, - deyə Lavrov bildirib. Nazir qeyd edib ki, NATO praktiki olaraq getdikcə daha çox “baxışlarını Arktika bölgəsinə çevirməyə və coğrafi mövqeyinə görə orada Şimali Atlantika Alyansının maraqlarının da olduğunu” bəyan etməyə başlayıb. “Norveç yarandığı gündən NATO-nun üzvüdür, ona görə də deyirlər ki, biz burada baş verənlərə diqqət yetirməliyik. Arktika Şimali Atlantika Alyansının ərazisi deyil”, - deyə o vurğulayıb. “NATO-nun qloballaşmaq və qanuniləşdirmək, özünü artıq Şimali Atlantika deyil, dünya jandarması kimi göstərmək istəyi Arktika bölgəsinə də şamil edilir”, - deyə Lavrov əlavə edib. Bundan əlavə, Rusiya Xarici İşlər Nazirliyinin rəhbəri Arktikada işləməkdə maraqlı olan çoxlu qeyri-Arktik dövlətlərin olduğuna diqqət çəkib. “Onların arasında bizim yaxın strateji tərəfdaşlarımız Çin və Hindistan da var. Bizim hər iki tərəflə (birgə layihələr də daxil olmaqla) üçtərəfli əməkdaşlıq perspektivləri yaradan çoxlu layihələrimiz var. Onlar iqtisadi əlaqələrin inkişafını, Arktika regionunun inkişafında texnologiyaların tətbiqini, LNG istehsalını, Şimal Dəniz Marşrutunun istifadəsini və onun Asiya ilə Avropa arasında daha da əlverişli marşruta çevrilməsi üçün modernləşdirilməsini nəzərdə tutur”, - deyə nazir qeyd edib. Qadir, Bizimyol.info