Ukrayna rəsmiləri qərbli həmkarları ilə ünsiyyətdə atəşkəs razılaşmasının əldə edilməsinə daha açıq olublar.
HİT.az xəbər verir ki, bu barədə “Financial Times” (FT) mənbələrə istinadən yazıb.
Nəşrin məlumatına görə, sentyabrda Nyu Yorkda BMT Baş Assambleyasına qatılan avropalı diplomatlar nizamlanmanın mümkünlüyü ətrafında müzakirələrin tonunda və məzmununda nəzərəçarpacaq dəyişiklikləri qeyd ediblər.
Qərb diplomatlarının sözlərinə görə, Ukrayna Xarici İşlər Nazirliyinin yeni rəhbəri Andrey Sibiqa ABŞ-a səfəri zamanı həmkarları ilə görüşlər zamanı “potensial kompromis həll yollarını” müzakirə edib. FT yazır ki, o, təhlükəsizlik üçün torpaqla bağlı danışıqların mümkünlüyü ilə bağlı daha praqmatik mövqe tutub. Hansı konkret həll variantlarının müzakirə edildiyi açıqlanmır.
“Biz bunun necə bitəcəyi və Ukraynanın daimi sülh razılaşması əldə etmək üçün nədən imtina etməli olacağı barədə getdikcə daha açıq danışırıq. Və bu, altı ay əvvəl belə söhbətlərin tabu olduğu vaxtdan ciddi dəyişiklikdir”, deyə Nyu Yorkda iştirak edən diplomatlardan biri bildirib.
Ötən ay “La Repubblica” Almaniya kansleri Olaf Şoltsun keçmiş Ukrayna ərazilərinin bir hissəsinin Rusiyaya verilməsini istisna etməyən sülh planı hazırladığını bildirmişdi. "El Pais"ə görə, Ukrayna hakimiyyətinə danışıqların lehinə xarici təzyiqlər artır, bu müddət ərzində Ukrayna “ağrılı güzəştlərə getməyə məcbur olacaq”. "Bloomberg" yazıb ki, Ukraynanın ən azı bir müttəfiq ölkəsi Vladimir Putinlə təmasları bərpa etməyi təklif edib.
İyun ayında Rusiya prezidenti Vladimir Putin aşağıdakı sülh şərtlərini təklif edib: DXR, LPR, Zaporojye və Xerson vilayətlərinin Rusiyanın bir hissəsi kimi tanınması, Ukrayna qoşunlarının oradan çıxarılması və Ukraynanın NATO-ya üzv olmaqdan rəsmi imtinası. Ukrayna Silahlı Qüvvələrinin Kursk vilayətinə daxil olmasından sonra Rusiya hakimiyyəti sülh danışıqları mövzusunun aktuallığını itirdiyini bildirib.
Samir
