ABŞ-ın texnologiya şirkəti Apple-ın Baş Direktoru (CEO) Tim Cook (Tim Kuk), süni intellekt xidmətlərini smartfon modeli iPhone-lara inteqrasiya etməyə hazırlaşdığı bir vaxtda şirkət üçün mühüm bazar olan Çinə səfər edib.
Marja xəbər verir ki, Tim Kuk, Çinin Weibo sosial şəbəkəsində şəxsi hesabından Pekinə səfəri ilə bağlı paylaşımlar edib.
Çinli fotoqraf Chin Man ilə Pekin küçələrini dolaşan və Apple-ın yeni smartfon modeli ilə fotoşəkillər çəkdirən Kuk, Çin Kənd Təsərrüfatı Universiteti və Cıciang Universitetinin tələbələri ilə Şunyi rayonundakı bir fermada kənd təsərrüfatında səmərəlilik və davamlılıq üçün rəqəmsal texnologiyaların tətbiqi ilə tanış olub.
Kuk Vanqfuçinq (Vangfucing) rayonundakı Apple mağazasına baş çəkib, işçilər və müştərilərlə vaxt keçirib.
Maraqlıdır ki, Kukun səfəri “Apple” şirkətinin “Apple Intelligence” adı altında məhsuldar süni intellekt xidmətlərini smartfonlara və digər cihazlara inteqrasiya etməyə hazırlaşdığı dövrə təsadüf edir.
Cook avqust ayında şirkətin balans hesabatı yığıncağında, Çin və Avropa Birliyi ölkələrində süni intellekt xüsusiyyətlərini bazara təqdim etməzdən əvvəl müvafiq qanunvericiliyi ətraflı şəkildə anlamaları lazım olduğunu vurğulamışdı.
Çində tənzimləyici orqanlar bu ilin ilk 8 ayında 188 məhsuldar süni intellekt xidmətinin istifadəsini təsdiqləsələr də, onların hamısı materik Çindəki şirkətlər tərəfindən hazırlanıb.
Kukun səfər proqramında rəsmi görüşlərin olub-olmadığı hələlik məlum deyil.
Apple şirkətinin rəhbəri bu il ikinci dəfə Çinə səfər edib. Kuk bundan əvvəl mart ayında Çin İnkişaf Forumunda (CDF) iştirak etmək üçün Çinə səfər etmişdi və forum çərçivəsində ABŞ-dan olan iş adamları ilə birlikdə Baş nazir Li Jiang ilə görüşmüşdü.
