Milli Məclisin Regional Məsələlər komitəsinin sədri Siyavuş Novruzov Almaniyanın Federal kansleri Olar Şoltsun COP29 tədbirində iştirakdan imtina etməsinə münasibət bildirib.
Komitə sədri Pravda.az-a açıqlamasında deyib ki, 200-dən artıq dövlət COP29-un Azərbaycanda keçirilməsini dəstəkləyib: "Azərbaycan tədbirə çox yüksək səviyyədə hazırlıq işləri aparıb. İndiyə qədər Azərbaycanda bütün beynəlxalq tədbirlər ən yüksək səviyyədə keçirilib. "Avroviziya" standartlarını Azərbaycan elə dəyişdi, hər kəs dedi ki, gərək, bundan sonra bütün ölkələr bu standartlara uyğunlaşsınlar. Heydər Əliyev Fondu tərəfindən mütəmadi millətlərarası, dinlərarası əlaqələr mövzusunda yüksək səviyyədə tədbirlər keçirilir. COP29-da da istənilən dövlət iştirak edə bilər, istənilən dövlət iştirak etməyə bilər. İqlim dəyişikliyi bəşəriyyət üçün olan məsələdir, Azərbaycanın daxili məsələsi deyil. Dünyada gedən ekoloji prosesləri, o cümlədən iqlim dəyişmələrinin qarşısının alınması üçün dövlətlərin güclərinin sərf olunmasıdır. Dünya bir deyil, çoxqütblüdür. İki-üç adam tədbirə gəlmirsə, bunu faciə kimi təqdim etmək lazım deyil. Gəlir gəlsin, gəlmir gəlməsin. Borcumuzu yerinə yetirib dəvətimizi göndərmişik. Bu, təkcə bizə yox, BMT-yə hörmətsizlikdir. Çünki COP BMT-nin tədbiridir. Biz isə COP29-un təşkilatçısıyıq. Gəlmirlər, özləri bilərlər. Biz də onların tədbirlərində iştirak etmərik. Tədbirə gəlməyənlər burada qəbul olunacaq sənədlərin mahiyyətini və hüquqi qüvvəsini aşağı sala bilməzlər. Əvvəlcədən bəlli idi - Avropa parlamentində qəbul olunan anti-Azərbaycan qərarları, ABŞ Konqresinin Dövlət Departamentinə müraciətləri... Hələ ABŞ-də yeni rəhbərlik hakimiyyətə gəlməyib, yanvar ayında gələcək. Hələlik Bayden hakimiyyətidir. Bayden hakimiyyətinin isə Azərbaycanla münasibətləri aydındır. İdman, musiqi oyunlarını siyasiləşdirdilər. İndi də ekologiya ilə bağlı tədbirləri siyasiləşdirməyə çalışırlar və bundan təzyiq metodu kimi istifadə etməyə çalışırlar. Azərbaycana qarşı daim ədalətsiz qərarlar qəbul etdilər, Ermənistana yardım göstərirlər, Azərbaycan ərazisində cinayət, soyqırımı törətmiş erməni əsilli insanların azadlığa buraxılmasını tələb edirlər və COP29-da bundan istifadə etmək, tədbiri siyasiləşdirmək istəyirlər. Aydındır ki, bu, baş tutmayacaq".
Aytəkin Qardaşova
