Gənclərin iqlim məsələləri ilə bağlı qərarların qəbulu prosesinə daha geniş şəkildə cəlb edilməsini nəzərdən keçirmək lazımdır.
Milli.Az Trend-ə istinadən xəbər verir ki, bunu BMT-nin İqlim Dəyişikliyi üzrə Gənclər Agentliyinin (YNA) vəkillik şöbəsinin rəhbəri Çarli Bevis COP29-da keçirilən YNA Gənclər Liderliyi Forumunda bildirib.
"Bugünkü müzakirəmizin əsası təkcə YNA-nın gələcəyi haqqında deyil, həm də gənclərin iqlimlə bağlı qərar qəbul etməkdə daha geniş iştirakı barədə düşünməkdir. Gənclərin iştirakını və iştirak etməsini təmin etmək üçün, özümüzdən başqa, gənclərin burada olmasının, danışıqlar masasında oturmasının, iqlim məsələlərinin həllində mənalı iştirak etmək bacarığı və biliklərinin olmasının nə demək olduğunu tənqidi düşünmək lazımdır", - o qeyd edib.
Qeyd edək ki, BMT-nin İqlim Dəyişikliyi üzrə Çərçivə Konvensiyasının (COP29) Tərəflər Konfransının 29-cu sessiyası bu gündən Azərbaycanda start götürür. Bununla bağlı qərar ötən il dekabrın 11-də Dubayda keçirilən COP28 plenar iclasında qəbul edilib.
Birləşmiş Millətlər Təşkilatının İqlim Dəyişikliyi üzrə Çərçivə Konvensiyası 1992-ci ilin iyununda Rio-de-Janeyroda keçirilən Yer Sammitində insanın iqlim sisteminə təhlükəli müdaxiləsinin qarşısını almaq üçün imzalanmış sazişdir. "COP" (Conference of Parties) abbreviaturası İqlim Dəyişikliyi üzrə Çərçivə Konvensiyasının icrasına nəzarət edən ən yüksək qanunverici orqan olan "Tərəflərin Konfransı" mənasını verir.
Konvensiyada 198 ölkə iştirak edir. Tərəflər başqa cür razılaşmırsa, COP hər il keçirilir. İlk COP tədbiri 1995-ci ilin martında Berlində baş tutdu və onun katibliyi Bonnda yerləşir.
Milli.Az
