“Mançester Yunayted”in kamerunlu qapıçısı Andre Onana “quru” oyunlar üzrə cari mövüm İngiltərə Premyer Liqasının lideridir.
Arena.az məlumat verir ki, “qırmızı şeytanlar”ın bərbad oyunu mənzərəsinədə belə, Onana 5 oyunda qapısının toxunulmazlığını təmin edə bilib.
Müvafiq göstərici üzrə ikinci nəticə “Nottingem Forest”in belçikalı qapıçısı Mats Selsə aiddir – 4 “quru” oyun.
Üçüncü pilləni isə hər biri 3 “quru” oyun keçirmiş David Rayya (“Arsenal”), Alison Beker (“Liverpul”), Nik Poup (“Nyukasl”) və Cordan Pikford (“Everton”) bölüşürlər.
Andre Onana “Samuel Eto’O Futbol Akademiyası”nın yetirməsidir. Ardınca kamerunlu qapıçı “Barselona”nın akademiyasına keçib. Buradan “Ayaks”a yol tapmış Onana oyunu ilə diqqət çəkib və “İnter”in maraq dairəsinə düşərək “neradzurri”nin heyətinə transfer edilib. Kamerunlu qapıçı 2022/2023-cü illər mövsümündə “İnter”də yüksək səviyyədə çıxışı ilə diqqət çəkib.
“Mançester Yunayted” ispan qapıçı David De Xea ilə yollarını ayırmaq qərarına gəlincə, Andre Onananın transferinə çalışıb. “Qırmızı şeytanlar” 2023-cü ilin iyulunda buna nail ola biliblər və Onana 50,2 milyon avro məbləğ müqabilində “İnter”dən Mançester klubuna keçib. Kamerunlu qapıçı “qırmızı şeytanlar”la müddəti 2028-ci ilin iyun ayının sonuna qədər qüvvdədə olacaq müqavilə imzalayıb.
Onana cari mövsümündə “Mançester Yunayted”in heyətində bütün yarışlarda 16 oyuna çıxıb, 18 qol buraxıb, 6 oyunda qapısını toxunulmaz saxlayıb.
Onananın “qırmızı şeytanlar”ın heyətində çıxışının ümumi mənzərəsi 67 oyun, 101 buraxılmış qol və 19 quru oyundan ibarətdir.
Andre Onana 2016-cı ilin sentyabrında debüt etdiyi Kamerun yığmasında 44 oyun keçirib, 36 qol buraxıb, 19 oyunda qapısının toxunulmazlığını təmin edib.
Andre Onana böyük futbolda “Ayaks” və “İnter”lə qənimətlər qazanıb. Kamerunlu qapıçı “Ayaks”la 3 dəfə Niderland çempinluğuna, 2 dəfə Niderland Kubokuna, 1 dəfə Niderland Super Kubokuna sahib olub. “İnter”lə isə İtaliya Kubokunun və İtaliya Super Kubokunun qalibi, həmçinin ötən mövsüm Çempionlar Liqasının finalçısı olub. “Mançester Yunayted”lə isə Onana İngiltərə Kubokunun qalibi olub.
“Transfermarkt” internet-portalı 28 yaşlı kamerunlu qapıçının transfer dəyərini 35 milyon avro məbləğində qiymətləndirir.
