Olaylar xəbər verir ki, bunu Azərbaycan Respublikası Minatəmizləmə Agentliyinin İdarə Heyətinin sədri Vüqar Süleymanov COP29 çərçivəsində keçirilən ANAMA-nın və BMT- nin İnkişaf Proqramının təşkil etdiyi "Cığırın tənzimlənməsi: İqlim dayanıqlılığı və dayanıqlı inkişaf üçün mina təhlükəsi ilə mübarizə" mövzusunda keçirilən tədbirdə deyib.
"Bu minalar və partlamamış hərbi sursatlar (PHS) torpağın bir vaxtlar zəngin olan bioloji müxtəlifliyini məhv edərək münbit torpaqları çirkləndirib, kənd təsərrüfatının məhsuldarlığına zərər vurub və əsaslı qoruma tədbirlərinə mane olub. Bu partlayıcı sursatlar təsadüfən və ya minatəmizləmə əməliyyatları zamanı partladıqda ağır metallar və digər toksinlər torpağa və havaya yayılaraq onu çirkləndirir. Bu kimyəvi çirklənmə bitki həyatına, vəhşi təbiətə və kənd təsərrüfatına uzunmüddətli risklər yaradır, meşələrin bərpasını və əkin torpaqlarının bərpasını çətinləşdirir", - o bildirib.
O bildirib ki, minatəmizləmə yalnız təhlükəsizliklə bağlı deyil:
"Bu, iqlim dayanıqlılığı və davamlı inkişaf üçün bir təməl daşıdır. Biz 170 min hektardan çox çirklənmiş torpağı təmizlədikcə, ekoloji bərpa, bioloji müxtəlifliyin yenidən bərpası və davamlı kənd təsərrüfatı üçün yol açırıq. Bu təmizlənmiş ərazilər kritik infrastrukturun yenidən qurulmasına və məcburi köçkünlərin geri qaytarılmasına imkan verir. Sərmayənin geniş miqyasına baxmayaraq, beynəlxalq ianələr ümumi maliyyələşmənin yalnız 4,4%-ni təşkil edir. Ölkəmizdə minaların hərtərəfli təmizlənməsini təmin etmək və bu təhdidlərin geniş ekoloji təsirlərini həll etmək üçün qlobal dəstəyi artırmaq vacibdir".
Qeyd edək ki, noyabrın 11-də BMT-nin İqlim Dəyişikliyi üzrə Çərçivə Konvensiyasının (COP29) Tərəflər Konfransının 29-cu sessiyasının açılışı olub.
COP29 çərçivəsində ən yüksək səviyyəli tədbir - Dünya Liderlərinin İqlim Fəaliyyəti Sammiti noyabrın 12-13-də təşkil olunub.
Noyabrın 22-dək Bakı Stadionunda keçiriləcək COP29 Azərbaycanın bu günədək təşkil etdiyi ən nəhəng tədbirdir və regionda ilk dəfə Azərbaycanda baş tutur.
COP29-dan əsas gözlənti iqlim maliyyəsi ilə bağlı ədalətli və ambisiyalı Yeni Kollektiv Kəmiyyət Hədəfinin (NCQG) razılaşdırılmasından ibarətdir.
COP29 Sədrliyi tərəfindən iqlim fəaliyyəti ilə dayanıqlı inkişaf məqsədləri arasında əlaqəni ehtiva edən, yaşıl enerji dəhlizləri, yaşıl enerji saxlancları, iqlim dayanıqlılığı üçün harmoniya, təmiz hidrogen, orqanik tullantılarda metanın azaldılması, yaşıl rəqəmsal fəaliyyət və digər mövzuları əhatə edən 14 təşəbbüs irəli sürülüb.
İqlim maliyyəsinin yaradılması fəaliyyət üçün şərait yaradan əsas prioritet olmaqla yanaşı, hamını bir araya gətirməklə 1,5°C öhdəliyinin yerinə yetirilməsinə töhfə verəcək.
