Tsukerberq Ağ Evin COVID-19-la bağlı Facebook-a təzyiqlər göstərdiyini deyib

Meta şirkətinin qurucusu Mark Tsukerberq deyir ki, Ağ Ev ona Facebook-da COVID-19-la bağlı kontentin senzura olunması üçün təzyiqlər göstərib. ABŞ Nümayəndələr Palatasının məhkəmə sistemi üzrə komitəsinə məktubunda Tsukerberq yazır ki, Ağ Evin vəzifəli nümayəndələri Facebook əməkdaşları üzərinə təzyiqlər ediblər. Onun sözlərinə görə məmurlar yumor və satira da daxil, kontentin platformadan silinməsini və ya məhdudlaşdırılmasını istəyirdilər. Tsukerberq etiraf edib ki, hökumət tərəfindən Facebook-a təzyiqlər səhv addım idi. O daha əvvəl bu təzyiqlərə qarşı çıxmadığına görə təəssüfünü bildirib. Bundan başqa Meta şirkətinin qurucusu yazır ki, Facebook Co Baydenin ailəsində iddia olunan korrupsiya ilə bağlı materialın reytinqini azaldıb. Tsukerberq izah edib ki, bu, Rusiya dezinformasiyası təhlükəsinə görə faktların yoxlanması ilə bağlı idi. Meta rəhbəri vəd edib ki, onun şirkəti bundan sonra yoxlanmamış materiallara belə münasibət göstərməyəcək. 2021-ci ilin avqustunda Meta bildirmişdi ki, pandemiya zamanı Facebook və Intagram-da COVID-19 haqqında dezinformasiyanın yayılması qaydalarını pozan 20 milyonadək post silinib. Bundan başqa 190 milyondan çox posta “informasiya yanlışdır” qrifi vurulub. AzadlıqRadiosu

• Təzyiq
• Ağ Ev
• Təzyiqlər
• Facebook
• Covid-19
• Meta
• Senzura
• Mark Tsukerberq