Azərbaycanın Keniyadakı səfiri Sultan Hacıyev Şərqi Afrika ölkəsinin gənclər və idman naziri Kipçumba Murkomenlə görüşərək onunla innovasiya, yaşıl enerji, habelə idman kimi sahələrdə əməkdaşlıq imkanlarını nəzərdən keçirib.
İqtisadiyyat.az xəbər verir ki, bu barədə afrikalı siyasətçi sosial şəbəkədə paylaşım edib.
“Bu gün günorta “Talanta Plaza”da mənimlə nəzakətli görüşə gəlmiş Azərbaycanın Keniyadakı səfiri Zati-aliləri Sultan Hacıyevlə səmərəli söhbət etdim. Biz kənd təsərrüfatı, innovasiya, yaşıl enerji, idman və yaradıcı iqtisadiyyat daxil olmaqla müxtəlif sektorlarda gənclər arasında sosial-iqtisadi transformasiyanın həyata keçirilməsi istiqamətində əməkdaşlıq imkanlarını nəzərdən keçirdik”, – Murkomen qeyd edib
