Türkiyənin xarici işlər naziri Hakan Fidan Qərb dövlətlərinin Rusiyaya qarşı tətbiq etdiyi sanksiyaların ləğvinin Ukraynadakı münaqişənin həlli ilə bağlı mümkün danışıqların gündəmində olacağını bildirib.
O təklif edib ki, noyabrda keçirilməsi planlaşdırılan ABŞ seçkilərindən sonra danışıqlar başlaya bilər. “Onlar (sanksiyalar), əlbəttə ki, bir böyük təkliflər paketi formatında gündəliyə daxil ediləcək. Və müzakirənin necə getdiyini görəcəyik. Əgər həllə nail olmaq mümkün olmasa, o zaman bütün münaqişə ya miqyasda daha da böyüyəcək, ya da donub qalacaq”, – deyə nazir “Anadolu”ya müsahibəsində təklif edib.
Bazarlar və onların strategiyaları, eləcə də təhlükəsizlik mexanizmləri “hələ də münaqişəni müvəqqəti olaraq qəbul edirlər”. Lakin yaxın aylarda hər şey “kritik və qalıcı nəticələrə çevrilə bilər”, – Türkiyə XİN rəhbəri xəbərdarlıq edib. Hakan Fidanın sözlərinə görə, Türkiyə vasitəçilik etmək üçün siyasi iradə nümayiş etdirir və danışıqlar məsələsini prioritet olaraq saxlayır.
O əlavə edib ki, praktikada Ankara münaqişənin diplomatiya yolu ilə həlli üçün çox şey edib.
Xatırladaq ki, iyun ayında prezident Vladimir Putin demişdi ki, Rusiyaya qarşı sanksiyaların ləğvi Ukraynadakı döyüşlərin sülh yolu ilə nizamlanmasının bir hissəsi olmalıdır. O, münaqişəyə son qoymağın digər şərtləri kimi Ukrayna Silahlı Qüvvələrinin qondarma “DXR” və “LXR”, Xerson və Zaporojye vilayətlərindən çıxarılmasını, habelə Ukraynanın NATO-ya üzv olmaqdan imtina etməsini göstərib.
//Samir Qurbanov, Editor.az
