2020-ci il noyabrın 8-i Azərbaycan tarixində şanlı bir səhifə olaraq əbədi qalacaq. Bu gün, müzəffər ordumuzun Şuşa şəhərini işğaldan azad etməsi ilə tarix yazıldı. Düşmənin əlverişli mövqelərdən və zirehli texnikalardan istifadə etdiyi şəraitdə qəhrəman əsgər və zabitlərimiz, sıldırım qayalar, dərin dərələrdən keçərək, Qarabağın döyünən qəlbi olan Şuşanı işğaldan azad etdilər. Bu böyük Zəfər, Azərbaycan Prezidentinin Sərəncamı ilə Zəfər Günü olaraq əbədiləşdirildi.
Şuşa Zəfərinə gedən yolun başlanğıcı Ulu Öndər Heydər Əliyev tərəfindən qoyulmuşdu. Ulu Öndərin qurduğu möhkəm təməl üzərində, Prezident İlham Əliyev Azərbaycanın iqtisadi və hərbi gücünü artıraraq bu böyük hədəfə addım-addım yaxınlaşdı. Şuşanın işğaldan azad edilməsi, döyüşçülərimizin yüksək peşəkarlığı, fədakarlığı və inamı sayəsində mümkün oldu. Tanklarla və zirehli texnikalarla silahlanmış düşmənin qarşısına çıxan əsgərlərimiz, çətin şəraitdə irəliləyərək tarixi bir qələbə qazandılar.
Prezident İlham Əliyev müharibənin ilk günlərindən Şuşanın azad edilməsinin vacibliyini vurğulamışdı. 44 gün ərzində ordumuz dayanmadan Şuşaya doğru irəlilədi. Müharibə zamanı, düşmənin on minlərlə fərarisi olduğu halda, bizim əsgərlərimizin bir addım belə geri çəkilmədiyini müşahidə etdik. Bu, yalnız Azərbaycan Silahlı Qüvvələrinin deyil, həm də bütün Azərbaycan xalqının Zəfəri idi. Üç minə yaxın şəhid Vətən uğrunda canını fəda etdi, xalqımız bir yumruq kimi birləşərək müzəffər oldu.
Şuşanın azad edilməsi, yalnız hərbi deyil, həm də milli qürur baxımından böyük bir əhəmiyyət kəsb edir. Bu Qələbə Ali Baş Komandan İlham Əliyevin rəhbərliyi ilə Azərbaycanın gücünü və iradəsini bir daha bütün dünyaya göstərdi. Zəfər, danışıqlar masasında deyil, döyüş meydanında qazanıldı. Dövlət başçısının dediyi kimi, Şuşa bizimdir, Qarabağ Azərbaycandır!
Postmüharibə dövründə Şuşa şəhərində böyük quruculuq və bərpa işləri həyata keçirildi. “Zəfər yolu”nun tikintisi, infrastruktur layihələri və mədəniyyət abidələrinin bərpası bu qədim şəhərin yenidən həyat qazanmasına xidmət etdi. Şuşa, həmçinin Azərbaycanın mədəni və ictimai həyatının mərkəzi olaraq əhəmiyyətini qoruyur.
Tarixi Zəfər, hər bir azərbaycanlının qəlbində əbədi yaşayacaq. Şuşanın azad edilməsi, Azərbaycanın müstəqilliyinin və gücünün simvoluna çevrilib. Bu, həmçinin milli həmrəyliyimizin və iradəmizin nümayişidir. Möhtəşəm Qələbə ilə Şuşa, yenidən Azərbaycanın gələcəyinə doğru böyük bir addım atdı.
Fəsli Nəbiyev
YAP Gənclər Birliyinin sədr müavini
