Donald Trampa qarşı iki cinayət işinə rəhbərlik edən xüsusi prokuror Cek Smit respublikaçı 2025-ci ilin yanvarında Ağ Evə qayıdana qədər istefa verməyi planlaşdırır.
Qaynarinfo xəbər verir ki, bu barədə "The New York Times" mənbələrə istinadən yazıb.
Donald Trampın özü inauqurasiyadan sonra onu "iki saniyə ərzində" işdən çıxaracağını vəd edib.
2022-ci ilin noyabrında xüsusi müşavir təyin edilmiş Cek Smit ABŞ-ın 45-ci prezidentinin məxfi sənədləri qeyri-qanuni saxlaması və 2020-ci il seçkilərinə müdaxilə cəhdi ilə bağlı cinayət işi qaldırıb. NYT mənbələri iddia edir ki, Smit təhqiqatı başa çatdırmaq və Donald Tramp vəzifəyə başlamazdan əvvəl komandası ilə birlikdə vəzifəsini tərk etmək niyyətindədir.
Qeyd edilir ki, ABŞ Ədliyyə Departamentinin çoxdankı siyasəti vəzifədə olan prezidentin cinayət məsuliyyətinə cəlb edilməsini qadağan edir və buna görə də departament işlərin araşdırılmasını dayandırmağa hazırlaşır. Bununla belə, bu işin mexanizmi müəyyən edilməyib, qərarı Cek Smit verməlidir. Noyabrın 9-da Donald Trampın qələbəsi artıq bəlli olanda xüsusi prokuror məhkəmədən seçkiyə müdaxilə prosesini dayandırmağı xahiş edib. O, dekabrın 2-dək işin "görünməmiş" hallarını dəyərləndirməli və gələcək niyyətləri barədə hesabat təqdim etməlidir.
2017-2021-ci illərdə prezident olmuş Donald Trampa qarşı bir neçə cinayət işi araşdırılır. Noyabrın 12-də məhkəmə onlardan digəri - porno ulduz Stormi Danielsə siyasətçi ilə mümkün əlaqə barədə susduğu üçün 130 min dollar ödənilməsi üzrə prosesi dayandırıb. Prokurorluq və müdafiə tərəfi iclasın təxirə salınması barədə vəsatət göndərib.
Aydın
