“BNP Paribas” bankın proqnozlarına görə, avro/dollar məzənnəsi 2025-ci ilin sonuna qədər 1.15 dollar səviyyəsinə yüksələcək.
Banker.az-ın İnvestisiya bölməsi bu barədə bankın son qeydlərinə istinadən xəbər verir.
“BNP Paribas Markets 360” hesab edir ki, qlobal resessiya halında avro dollara nisbətən yüksələ bilər ki, bu da keçmiş ticarət modelindən fərqli bir nəticəni ifadə edir.
Bankın makrostrategiyalar bölməsinin rəhbəri Sem Linton-Braun, komandanın mübahisəli fikirlərindən biri adlandırdığı bu proqnoz üçün bir sıra səbəblər göstərib.
Xüsusilə, dollar hazırda yüksək gəlirli valyuta kimi istifadə olunur. Bu, tarixən belə olmayıb. Bu da o deməkdir ki, ABŞ-də uçot faiz dərəcəsi endikdə dollar daha həssas ola bilər. Digər bir amil isə ABŞ Federal Ehtiyat Sisteminin faizlərini bir çox digər mərkəzi banklarla müqayisədə hazırda neytral səviyyədən daha yüksək tutmasıdır.
Bundan başqa, Linton-Braun qeyd edir ki, valyuta blokunda avro və periferiya dövlət istiqrazlarının spredləri riskdən qaçma dövrlərinə daha az həssas olub ki, bu da avro üçün müsbət amildir.
Avro/dollar cütlüyü dünya valyuta bazarında ən çox ticarət edilən cütlükdür. Gündəlik həcmi 7.5 trilyon dollar ekvivalentindədir. Bu cütlüyün istiqamətini müəyyən edən amillər dünya üzrə investorlar tərəfindən diqqətlə izlənilir.
“BNP Paribas Markets 360”ın əsas ssenarisi ABŞ iqtisadiyyatının yumşaq enişidir. Onun proqnozlarına görə, avro/dollar məzənnəsi 2025-ci ilin sonuna qədər 1.15 dollara yüksələcək, bu da cari səviyyələrdən təxminən 3.5% artım deməkdir (Hazırda təxminən 1.11 dollardır).
Xatırladaq ki, “Reuters”in son sorğusuna görə, bir ildən sonra avronun məzənnəsi təxminən 1.12 dollar olacaq.
Çərşənbə günü ABŞ FED-nin dörd ildən sonra ilk dəfə faiz dərəcələrini azaltması və bəlkə də yarım faiz bəndinə qədər azaltması gözlənilir. Faiz dərəcələrinin həddindən artıq azaldılması ilə bağlı spekulyasiyalar artıq dollara mənfi təsir göstərib. ABŞ iqtisadiyyatının – xüsusən də əmək bazarının – gözləniləndən daha sürətlə yavaşladığına dair hər hansı işarələr narahatlıqları daha da artıra bilər.
