Hollandiyanın ardınca Macarıstan da Avropa İttifaqının miqrasiya qaydalarına əməl etməkdən imtina etmək niyyətində olduğunu açıqlayıb.
Herbiand.az xəbər verir ki, bu barədə çərşənbə günü, sentyabrın 18-də Macarıstanın Avropa işləri üzrə naziri Yanoş Boka məlumat verib.
Nazir X sosial şəbəkəsindəki səhifəsində yazıb: “Qeyri-qanuni miqrasiyaya qarşı güclü tədbirlərə ehtiyac var. Məhz buna görə də Budapeşt Aİ-nin sığınacaqla bağlı qaydalarından çıxmaq üçün Avropa Komissiyasına müraciət etmək istəyir. Bundan əvvəl Hollandiya Avropa Bürosuna oxşar sorğu göndərmişdi. Hollandiyanın ən böyük sağçı populist Azadlıq Partiyasının (PVV) lideri Geert Wilders, "bu, yeni bir küləyin əsdiyinə işarədir" dedi.
Çətin ki, Hollandiya və Macarıstan öz təşəbbüsü ilə uğur qazansınlar. Bu dövlətləri Aİ miqrasiya sistemindən çıxarmaq üçün onun 27 üzvünün hamısının razılığı tələb olunacaq.
Baş nazir Viktor Orbanın rəhbərlik etdiyi Macarıstanın sağçı hökuməti uzun illərdir ki, miqrantlara qarşı siyasət yürüdür və buna görə də Avropa Komissiyası ilə daim ziddiyyətli mövqe nümayiş etdirir. Budapeşt hazırda Avropa Məhkəməsinin sığınacaqla bağlı məhdudlaşdırıcı siyasətinə görə təyin etdiyi 200 milyon avroluq cəriməni ödəməkdən imtina edir. Buna görə də Brüssel bu pulu Aİ-nin Macarıstana gələcək ödənişlərindən tutmaq istəyir.
