“Mançester Yunayted”in keçmiş futbolçusu Roy Kin portuqaliyalı Ruben Amorimin “qırmızı şeytanlar”a baş məşqçi təyin edilməsini şərh edib.
Arena.az irland veteran futbolçunun bu barədə fikrini təqdim edir:
“Ruben Amorim daha uzunmüddətli müqavilə imzalamalı idi. Bu, çox ortabab bir komandadır, qarşıda isə çox uzun bir yol var. Bunu elə, statistika da təsdiqləyir. Hər şey mükəmməlikdən uzaqdır. İndiki “Mançester Yunayted” hər xüsusda orta səviyyədədir, oyununda isə vurğulanacaq heç nə yoxdur”, deyə Roy Kin bildirib.
Xatırladaq ki, Ruben Amorim “qırmızı şeytanlar”la müddəti 2027-ci ilin iyun ayının sonuna qədər qüvvədə olacaq 2 illik müqavilə imzalayıb.
“Çelsi”nin baş məşqçisi Entso Mareska isə portuqal mütəxəssis Ruben Amorimin “Mançester Yunayted”də uğur qazanacağına əmindir. İtalyan mütəxəssisin bu barədə fikrini təqdim edirik:
“Amorim “Mançester Yunayted”dəki işinin öhdəsindən məharətlə gələcək”, deyə italiyalı məşqçi bildirib.
Vurğulayaq ki, Amorim Avropanın ən perspektivli çalışdırıcılarından biri hesab edilir. “Sportinq”də Amorim Portuqaliya nəhəngləri “Benfika” və “Portu”ya divan tutan rəqabətəqadir kollektiv təsis edə bilib. Məhz bu amil “Mançester Yunayted”in Ruben Amorimi “qırmızı şeytanlar”a yeni baş məşqçi seçməsində əsas olub.
Ruben Amorim məşqçiliyə 2018/2019-cu illər mövsümündə “Kaza Piya” klubunda başlayıb. Bundan sonra gənc portuqal mütəxəssis “Braqa”nın “B” komandasını, ardınca isə əsas komandasını çalışdırıb. 2020-ci ilin mart ayında isə Amorim “Sportinq”in sükanı arxasına keçib. Portuqal mütəxəssisin Lissabon klubu ilə müqaviləsi 2026-cı ilin iyun ayının sonuna qədər qüvvə idi.
Amorim rəhbərliyi müddətində “şirlər”ə 2 dəfə Portuqaliya Premyer Liqasını (2020/2021, 2023/2024), 2 dəfə Portuqlaiya Liqa Kuboku (2020/2021, 2021/2022) və Portuqaliya Super Kubokunu (2021/2022) qazandırıb. Həmçinin Amorim “Braqa” ilə Portuqaliya Liqa Kubokunun (2019/2020) qalibi olub.
Ruben Amorim “qırmızı şeytanlar”ın sükanı arxasına işinə noyabrın 11-də başlayacaq.
