Azərbaycan çempionu “Qarabağ”ın hücumameyilli yarımmüdafiəçisi Yassin Benzya Əlcəzair yığmasının heyətində növbəti oyuna çıxıb.
Arena.az xəbər verir ki, Əlcəzair millisi Afrika Millətlər Kubokunun seçmə mərhələsinin qrup mərhələsi çərçivəsində baş tutan Ekvatorial Qvineya ilə oyunun iştirakçısı olub.
Əlcəzair yığması səfərdə baş tutan görüşdən 1 xalla kifayətlənib – 0:0. Benzya bu matçın 70-ci dəqiqəsində meydana daxil olub.
Əlcəzair millisi bu qələbədən sonra yer aldığı E qrupunda 13 xalla birinci sırada qərarlaşıb.
Yassin Benzya 2023-cü ilin yanvar ayından “Qarabağ”da forma geyinir. Hücumameyilli yarımmüdafiəçi indiyə qədər Ağdam klubunun heyətində 74 oyuna çıxıb, 22 qol vurub, 21 məhsuldar ötürmə müəllifi olub. Yassinin Azərbaycan çempionu ilə 2025-ci ilin 30 iyununa kimi müqaviləsi var. O, karyerası ərzində “Lill”, “Olimpik” (Lion), “Dijon”, “Fənərbaxça”, “Hatayspor”, “Olimpiakos” kimi klublarda da forma geyinib.
30 yaşlı yarımmüdafiəçi 2016-cı ilin mart ayında debüt etdiyi Əlcəzair yığmasında da 12 oyunda 4 qol vurub, 1 məhsuldar ötürmə müəllifi olub.
Ange Mutsinzi Liviyaya qarşı 90 dəqiqə oynadı
“Zirə”nin futbolçusu Ange Mutsinzi də Ruanda yığmasında növbəti matçına çıxıb. O, Afrika Millətlər Kubokunun qrup mərhələsinin 5-ci turu çərçivəsində Liviyaya qarşı oyunda iştirak edib. Doğma meydanda baş tutan bu oyun Ruandanın məğlubiyyəti ilə yekunlaşıb – 0:1. Start heyətində yer alan 26 yaşlı müdafiəçi 90 dəqiqə meydanda olub.
Ruanda yığması 5 turdan sonra 5 xalla D qrupunda 3-cü pillədə yer alır.
Ange Mutsinzi “Zirə”yə bu ilin yayında Norveçin “Jerv” klubundan cəlb olunub. Mərkəz müdafiəçisi ilə 3 illik müqavilə imzalanıb. O, Azərbaycan klubunun heyətində hələlik 20 oyun keçirib.
Mutsinzi 2019-cu ilin sentyabr ayında debüt etdiyi Ruanda yığmasının heyətində 26 oyuna çıxıb, 1 məhsuldar ötürmə ilə yadda qalıb.
Tresor Mossi Malavi ilə oyunda ehtiyatda qaldı
“Sumqayıt”ın dayaq yarımmüdafiəçisi Tresor Mossi isə Burundi yığmasının Malaviya qarşı keçirdiyi ev oyununda ehtiyatda qalıb. 23 yaşlı futbolçuya qolsuz bitən bu matçda ehtiyac duyulmayıb.
L qrupunda yer almış Burundi hazırda 4 xalla 3-cü pillədə qərarlaşıb.
Tresor Mossi 2023-cü ilin avqustundan “Sumqayıt”ın uğurları üçün çalışır. Onun bu klubla 2027-ci ilin 30 iyununa qədər müqaviləsi var. Mossi “Sumqayıt”da 43 oyuna çıxıb, 1 assistlə yadda qalıb. 2020-ci ilin yanvar ayında Burundi yığmasında debüt etmiş Tresor, indiyə qədər millidə 8 oyun keçirib.
