“Real”ın braziliyalı cinah hücumçusu Vinisius Junior UEFA Çempionlar Liqasının 2023/2024 mövsümünün ən yaxşı oyunçusu mükafatını alıb.
Arena.az məlumat verir ki, braziliyalı ulduz mükafatına qovuşduqdan sonra, qəniməti ilə birlikdə özünün sosial şəbəkə hesabları üzərindən şəklini paylaşıb və ürək sözlərini yazıb:
“Səylə iş və xasiyyət özü sizi zirvələrə aparacaq. Bunun üçün bütün tərəfdaşlarıma təşəkkür edirəm.
Hər şey üçün təşəkkür edirəm. Biz daha çox səy göstərməyə davam edəcəyik!” – “Vini” paylaşdığı şəklə şərh olaraq dərc edib.
Xatırladaq ki, Vinisius ötən mövsüm Çempionlar Liqasınında “Real”ın 15-ci qalibiyyətini qazanmasında müstəsna oyunçu olub. Həlledici məqamlarda meydanda öz sözünü deməyi bacarmış “Vini” 10 oyunda “qaymaqlılar” üçün 6 qol vurub, 5 məhsuldar ötürmə verib.
Vinisius Junior “Flamenqo”nun yetirməsidir. Braziliyalı cinah hücumçusu “Real”a 2018-ci ilin iyul ayında 45 milyon avro məbləğ müqabilində elə, “Flamenqo”dan keçib. Vinisiusun İspaniya nəhəngi ilə müqaviləsi 2027-ci ilin iyun ayının sonuna qədər qüvvədədir.
Cari mövsümdə “Vini” madridlilərin heyətində 6 oyuna çıxıb, 2 qol və 4 məhsuldar ötürmə ilə fərqlənib. Vinisiusun “Real”da çıxışının ümumi mənzərəsi isə belədir: 270 oyun, 85 qol, 79 məhsuldar ötürmə.
“Vini” “qaymaqlılar”la İspaniya La Liqasının (2019/2020, 2021/2022, 2023/2024), İspaniya Kral Kubokunun (2022/2023), İspaniya Super Kubokunun (2019/2020, 2021/2022, 2023/2024), Çempionlar Liqasının (2021/2022, 2023/2024), UEFA Super Kubokunun (2022/2023, 2024/2025), FIFA Klub Dünya Kubokunun (2019, 2023) qalibi olub.
Vinisius Junior 2019-cu ilin sentyabrında debüt etdiyi Braziliya milli komandasının heyətində 35 oyun keçirib, 5 qol vurub və 5 məhsuldar ötürmə verib. “Vini” Braziliyanın U-15, U-17 komandaları ilə Cənubiamerikan Çempionatının qalibi olub.
“Transfermarkt” internet-portalı 24 yaşlı braziliyalı sol vingerin transfer dəyərini 180 milyon avro məbləğində qiymətləndirir. Bu isə Vinisiusun dünyanın ən bahalı dörd futbolçusundan biri olması deməkdir.
