Gürcüstan parlamentinin deputatları məhbuslara kütləvi amnistiya haqqında qanuna üçüncü və sonuncu oxunuşda səs veriblər.
Yeniavaz.com xəbər verir ki, parlamentin iclası qanunverici orqanın saytında yayımlanıb.
Qanunun lehinə 84 deputat səs verib. Sonra o, imzalanmaq üçün ölkə Prezidenti Salome Zurabişviliyə göndərilib.
Qeyd edək ki, daha öncə hakim “Gürcü Arzusu – Demokratik Gürcüstan” partiyası qanun layihəsinin təşəbbüskarı olub. Ona əsasən, Gürcüstanda bütün məhkumların təxminən üçdə biri ya cəzalarını çəkməkdən tamamilə azad ediləcək, ya da cəzaları yarıya, dörddə biri və ya altıda biri azalacaq.
Partiyanın icraçı katibi Mamuka Mdinaradzenin sözlərinə görə, amnistiya 6 minə yaxın məhbusu əhatə edəcək. Onlardan 1 mindən çoxu qanun qüvvəyə mindikdən sonra azadlığa buraxılacaq, qalanlarının cəzası azaldılacaq.
Amnistiya 2024-cü il iyulun 1-dək törədilmiş cinayət əməllərinə görə məhkum edilmiş şəxslərə şamil ediləcək. Bu, qatillərə, narkotik alverçilərinə və zorlayanlara, habelə digər ağır və xüsusilə ağır cinayətlər törətmiş şəxslərə şamil edilməyəcək.