1 iyul 2024-cü ildən etibarən Oxu.az mobil tətbiqinin köhnə versiyasına dəstək dayandırılacaq - yenilənmiş versiyanı endirmək üçün Google Play və ya AppStore-a keçməyiniz xahiş olunur.
"Azərbaycanda potensial olaraq "yaşıl" istiqraz namizədi olan şirkətlər var. Onların fəaliyyəti sırf alternativ enerji sahələrinin inkişaf etdirilməsidir. Həmin şirkətlərlə aktiv şəkildə danışırıq və mümkün qədər çalışırıq ki, onlar alternativ enerji istehsalı layihələrinin bir hissəsini də olsa, istiqraz emissiyası vasitəsilə maliyyələşdirsinlər".
Oxu.Az xəbər verir ki, bunu jurnalistlərə açıqlamasında Bakı Fond Birjasının (BFB) İdarə Heyətinin sədri Ruslan Xəlilov deyib.
O bildirib ki, bu, Azərbaycanda ilk "yaşıl" istiqrazların buraxılması demək ola bilər:
"Hələ ki, COP29 və "yaşıl" istiqrazlarla bağlı apardığımız işlər sırf bu istiqamətdədir. "Yaşıl" istiqraz məsələsinin bazasında istiqraz məhsulu dayanır. Sadəcə olaraq, istiqraz buraxılır ki, oradan əldə olunan vəsait karbon emissiyasının azaldılması, yaxud ətraf mühitə müsbət təsir edən bir layihəyə yönəldilsin. Hazırda bu istiqamətdə hansı potensial şirkətlərin nə vaxt bazara gələ bilməsi məsələsinə baxırıq".
R.Xəlilov BFB-nin COP29 ərəfəsində tədbir keçirəcəyini qeyd edib:
"Biz BMT-nin Dayanıqlı Fond Birjaları Təşəbbüs Qrupunun üzvüyük. Bu çərçivədə həm dayanıqlılıq baxımından maliyyə cəlb olunması, həm də "yaşıl" maliyyələşmənin inkişafının təmin edilməsi ilə bağlı mütəmadi görüşlər keçirilir və məlumatlandırmalar aparılır. Eyni zamanda, bu çərçivədə COP29 ərəfəsində məlumat xarakterli bir tədbirimiz olacaq. İnvestisiya şirkətləri və potensial emitentləri dəvət edəcəyik. Yaxın gələcəkdə gözlənilən məsələlər bunlardır".
"Uzaq dövr üçün isə ümid edirik ki, şirkətlərlə apardığımız danışıqlar nəticəsində, heç olmasa, iki-üç əsas şirkəti bazara gətirək ki, istiqraz bazarı vasitəsilə öz maliyyələşmələrini təmin etsinlər", - deyə R.Xəlilov əlavə edib.
Məhərrəm Əliyev
