ABŞ-də yaşayan soydaşımız, Corc Vaşinqton Azərbaycanlı Tələbə Assosiasiyasının həmtəsisçisi Kənan Məmmədovun ABŞ-nin “SDG Bilik Mərkəzi” jurnalında (SDG Knowledge Hub) “Davamlı İnkişaf Naminə Azərbaycanın Dövlət-Özəl Sektor Tərəfdaşlığı” adlı məqaləsi dərc olunub.
Məqalədə Azərbaycanın enerji səmərəliliyinin artırılması və dayanıqlı nəqliyyat sistemlərinin təkmilləşdirilməsinə yönəlmiş dövlət-özəl tərəfdaşlıqlarını təşviq etməklə mühüm addımlar atdığı qeyd olunub. Bu təşəbbüsün ölkənin iqtisadiyyatını şaxələndirmək və neft-qaz gəlirlərindən asılılığını azaltmaq üzrə geniş strategiyanın bir hissəsi olduğu vurğulanıb.
“Azərbaycan hökuməti binalarda enerji səmərəliliyinin artırılması istiqamətində fəal iş aparır. Avropa Yenidənqurma və İnkişaf Bankı və Asiya İnkişaf Bankı kimi beynəlxalq maliyyə institutları ilə əməkdaşlıq çərçivəsində ictimai binaların enerjiyə qənaət edən texnologiyalarla təchizi üçün həm texniki, həm də maliyyə yardımı alır. Azərbaycanın Energetika Nazirliyi, Dünya Bankı və Beynəlxalq Maliyyə Korporasiyası (IFC) tərəfindən açıqlanan yeni yol xəritəsində göstərilir ki, Azərbaycan 2040-cı ilə qədər 7 giqavattlıq dəniz külək enerjisi stansiyası qura bilər. Energetika Nazirliyi yaşayış və kommersiya binalarında bərpa olunan enerjidən istifadənin təşviqində fəallıq nümayiş etdirir. Diqqətəlayiq təşəbbüs Beynəlxalq Maliyyə Korporasiyası ilə əməkdaşlıq çərçivəsində Xəzər dənizinin külək enerjisi üçün yol xəritəsinin hazırlanmasıdır. Bu, bərpa olunan enerjiyə, küləkdən potensial olaraq sahildə 135 GVt-a və dənizdə 157 GVt-a qədər enerji istehsalı layihəsinə, həm yerli, həm də xarici investisiyaların cəlbi məqsədi daşıyır”,- deyə məqalədə qeyd olunub.
Müəllif məqalədə iyun ayında keçirilən Bakı Enerji Forumunda müzakirə olunan mövzulara da toxunub.
Məqaləni ətraflı şəkildə aşağıdakı linkdən oxumaq mümkündür:
//sdg.iisd.org/commentary/generation-2030/azerbaijans-public-private-partnerships-for-sustainable-development/
