“Real”ın baş məşqçisi Karlo Ançelotti paytaxt klubunun cinah hücumçusu Vinisius Juniorun 2024-cü il üçün “Qızıl top”u qazanacağına inanır.
Arena.az “Sport.es” dərgisinə istinadən məlumat verir ki, italyan mütəxəssis braziliyalı futbolçunun bu nüfuzlu fərdi mükafatı qazanmağa həm də digər oyunçulardan daha çox layiq olduğu fikrindədir:
“Düşünürəm ki, Vinisius keçən mövsüm, xüsusən də Çempionlar Liqasında göstərdiyi fəaliyyətinə görə “Qızıl top”u qazanmağa həqiqətən layiqdir. İnanıram ki, o, qalib gələcək, yoxsa, o zaman işləməyə davam edəcəyik, yükunda isə mükafat ona gələcək”, deyə Ançelotti vurğulayıb.
Xatırladaq ki, Vinisius Junior 2023/2024-cü illər mövsümünün ilk yarısını zədə səbəbindən buraxmalı olsa da, geri-dönüşü möhtəşəm alınıb. “Vini” sabit oyunu, vacib məqamlarda həlledici çıxışı, səmərəli fəaliyyəti və məhsuldar icraatı ilə diqqət çəkib.
Vinisius Junior “Flamenqo”nun yetirməsidir. Braziliyalı cinah hücumçusu “Real”a 2018-ci ilin iyul ayında 45 milyon avro məbləğ müqabilində elə, “Flamenqo”dan keçib. Vinisiusun İspaniya nəhəngi ilə müqaviləsi 2027-ci ilin iyun ayının sonuna qədər qüvvədədir.
Cari mövsümdə “Vini” madridlilərin heyətində 9 oyuna çıxıb, 3 qol və 6 məhsuldar ötürmə ilə fərqlənib. Vinisiusun “Real”da çıxışının ümumi mənzərəsi isə belədir: 273 oyun, 86 qol, 81 məhsuldar ötürmə.
“Vini” “qaymaqlılar”la İspaniya La Liqasının (2019/2020, 2021/2022, 2023/2024), İspaniya Kral Kubokunun (2022/2023), İspaniya Super Kubokunun (2019/2020, 2021/2022, 2023/2024), Çempionlar Liqasının (2021/2022, 2023/2024), UEFA Super Kubokunun (2022/2023, 2024/2025), FIFA Klub Dünya Kubokunun (2019, 2023) qalibi olub.
Vinisius Junior 2019-cu ilin sentyabrında debüt etdiyi Braziliya milli komandasının heyətində 35 oyun keçirib, 5 qol vurub və 5 məhsuldar ötürmə verib. “Vini” Braziliyanın U-15, U-17 komandaları ilə Cənubiamerikan Çempionatının qalibi olub.
“Transfermarkt” internet-portalı 24 yaşlı braziliyalı sol vingerin transfer dəyərini 180 milyon avro məbləğində qiymətləndirir. Bu isə Vinisiusun dünyanın ən bahalı dörd futbolçusundan biri olması deməkdir.
