ABŞ prezident seçkilərinə az qalmış keçirilən yeni sorğuya görə, Donald Trump Ağ Evin növbəti sahibinin kim olacağına qərar verəcək əsas ştatlarda, demək olar ki, Kamala Harrislə bərabər dəstək alır.
Ötən həftə dərc olunmuş Washington Post-Schar School-un keçirdiyi sorğu göstərir ki, seçkilərin qalibini müəyyən edəcək Arizona, Georgia, Michigan, Nevada, Şimali Carolina, Pennsylvania və Wisconsin ştatlarında hər iki namizəd, demək olar ki, bərabər dəstəyə malikdir.
Sorğu, həmçinin göstərir ki, Trump və Harris milli miqyasda bərabər dəstək alırlar - hər biri 47 faiz. Son həftələr keçirilən sorğuların əksəriyyətinə görə, orta hesabla ölkə üzrə Harris-in cüzi üstünlüyü var.
Nəticələr Britaniyanın Financial Times nəşri tərəfindən aparılan onlarla Amerika sorğuları aqreqatorunun məlumatları ilə üst-üstə düşür.
FT-nin məlumatlarına görə, həm əsas ştatlarda, həm də orta hesabla ölkə üzrə Trump və Harris bərabər dəstək qazanırlar. Dörd ən mühüm regionda sorğu nəticələrinin fərqi xəta həddindədir.
Şimali Carolina, Pennsylvania və Michigan ştatlarında namizədlərdən heç biri xəta həddindən kənar üstünlüyə malik deyil. Eyni zamanda, bu ştatlardan heç olmasa birində qalib gəlməyən hər hansı bir namizəd seçkilərdə qalib ola bilməyəcək.
Şəklin mənbəyi, Getty Images
