Dortmund “Borussiya”sının kapitanı, türkəsilli almaniyalı dayaq yarımmüdafiəçisi Emre Can intizam cəzası ilə üzləşib.
Arena.az bu barədə “Borussiya”nın mətbuat xidmətinə istinadən məlumat verir.
Alman Futbol İttifaqının (DFB) nizam-intizam komitəsi, ötən həftəsonu Bundesliqanın 10-cu turu çərçivəsində “Maynts”la səfər oyununda (1:3), kobud oyunu müqabilində birbaşa qırmızı vərəqə almış Emre Canı cəzalandırmağa qərar verib. İntizam Komitəsi Emre Cana 2 oyunluq cəza kəsib.
Beləliklə Emre Can Bundesliqa çərçivəsində 11-ci turun “Frayburq”la (23 noyabr) və 12-ci turun “Bayern”lə (30 noyabr) hər iki ev oyununda komandasına kömək edə bilməyəcək.
Dayaq yarımmüdafiəçisi olan Emre futbola “Blau Qelb” klubunda qədəm qoyub. Buradan Frankfurt “Ayntraxt”ı və ardınca Almaniya nəhəngi “Bayern”ə yol tapmış Can 2011-ci ildə böyük futbolda debüt edib.
Emre Can karyerası ərzində “Bayer”, “Liverpul” və “Yuventus”da çıxış edib. Dortmund “Borussiya”sı Emre Canı 2020-ci in iyulunda 25 milyon avro məbləğ müqabilində “Yuventus”dan tamhüquqlu əsasda öz düşərgəsinə qatıb. Buna qədər Can Dortmund klubunda icarə əsasında oynayıb. “Borussiya”nın Emre Canla müqaviləsinin müddəti 2026-cı ilin iyun ayının sonuna qədər qüvvədədir.
Cari mövsümdə Emre Can “Borussiya”nın heyətində bütün yarışlarda 16 oyuna 4 qol və 1 məhsuldar ötürmə ilə fərqlənib.
Emre Canın “Borussiya”nın heyətində çıxışının ümumi mənzərəsi 175 oyun, 18 qol və 11 məhsuldar ötürmədən ibarətdir.
Emre Can 2015-ci ilin sentyabrında debüt etdiyi Almaniya yığmasının heyətində 48 oyun keçirib, 2 qol və 2 məhsuldar ötürmə ilə fərqlənib.
Emre Canın qənimətlər muzeyində “Bayern”lə qazandığı Almaniya Bundesliqası Çempionluğu, Almaniya Kuboku, Almaniya Super Kuboku və Çempionlar Liqası, “Yuventus”la qazandığı İtaliya A Seriyası çempionluğu (2 dəfə) və İtaliya Super Kuboku var. “Borussiya” ilə isə Emre Can Almaniya Kubokunun qalibi olub. Həmçinin Can “bundestim”lə 2017-ci il Konfederasiyalar Kubokunun qalibi olub.
“Transfermarkt” internet-portalı 30 yaşlı yarımmüdafiəçinin transfer dəyərini 10 milyon avro məbləğində qiymətləndirir.
