Azərbaycan Respublikasının ərazisində yük daşımalarını həyata keçirən şəxslərin könüllü qaydada keçmiş tarixdən ƏDV qeydiyyatına alınması qaydası tənzimlənəcək.
Valyuta.az xəbərinə görə, bu Vergi Məcəlləsinə təklif edilən dəyişikliklərdə öz əksini tapıb.
Vergi Məcəlləsinin 157.3.3-cü maddəsinə əsasən ƏDV üzrə könüllü qeydiyyat həmin Məcəllənin 85.4-cü maddəsi ilə müəyyən edilmiş 3 il müddətindən çox olmamaqla, vergi ödəyicisinin qeydiyyat haqqındakı ərizəsində göstərilən tarixdə qüvvəyə minir. Həmin maddənin müddəaları Vergi Məcəlləsinin 218.4.1-c maddəsində göstərilən şəxslərə, habelə Azərbaycan Respublikasının ərazisində yük daşımalarını həyata keçirən şəxslərə tətbiq edilmir. İstisnanın səbəbi sərnişin və yükdaşıma ilə məşğul olan şəxslərin fərqlənmə nişanı alaraq fəaliyyət göstərmələri və vergini dövriyyəsinə görə deyil, standart məbləğdə ödəmələridir.
Lakin 2024-cü il yanvarın 1-dən Vergi Məcəlləsinə edilmiş dəyişikliyə əsasən yük daşımalarını həyata keçirən vergi ödəyiciləri tərəfindən "Fərqlənmə nişanı"nın alınması üçün verginin, məcburi dövlət sosial sığorta və icbari tibbi sığorta haqqının ödənilməsi tələb edilmir və qeyd edilən öhdəliklər həmin şəxslər tərəfindən qanunla müəyyən edilmiş qaydada yerinə yetirilir. Yəni həmin şəxslərin ardıcıl 12 aylıq dövriyyəsi 200 min manatdan aşağı olarsa, onlar 2% dərəcə ilə sadələşdirilmiş verginin, həmin həddən yuxarı olarsa isə mənfəət (gəlir) və ƏDV-nin ödəyicisi olmalıdırlar. Bu səbəbdən Vergi Məcəlləsinin 157.3.3-cü maddəsinə dəqiqləşdirici xarakterli dəyişiklik təklif edilir. Başqa sözlə, bu tələb 2024-cü il yanvarın 1-dən əvvəlki dövrə münasibətdə Azərbaycan Respublikasının ərazisində yük daşımalarını həyata keçirən şəxslərə tətbiq edilməyəcək, 2024-cü il yanvarın 1-dən Azərbaycan Respublikasının ərazisində yük daşımalarını həyata keçirən şəxslərə tətbiq ediləcək.
