"Xəzər dənizinin Hövsan və Türkan sahillərində balıqların kütləvi ölümü suda həll olmuş oksigenin miqdarının qeyri-optimal səviyyəyədək azalması ilə bağlıdır".
Avtosfer.az xəbər verir ki, bunu Ekologiya və Təbii Sərvətlər Nazirliyinin Bioloji Müxtəlifliyin Qorunması Xidmətinin rəisi Firuddin Əliyev bildirib.
O qeyd edib ki, xidmətin və nazirliyin Xəzər Kompleks Ekoloji Monitorinq İdarəsinin əməkdaşları tərəfindən sözügedən əraziyə baxış keçirilib, sudan və tələf olmuş balıqlardan nümunələr götürülüb.
"Balıq nümunələri üzərində aparılan analizlər zamanı infeksion xəstəliklərin törədiciləri, zəhərlənmə halları və kənar fiziki təzyiqlər aşkar edilməyib".
Xidmət rəisinin sözlərinə görə, su nümunələrinin analizi zamanı müəyyən edilib ki, suyun temperaturunun yüksək olması nəticəsində suda həll olmuş oksigenin miqdarı qeyri-optimal səviyyəyədək (2.2-2.5 mq/litr (norma-6 mq/litr) azalıb və bu səbəbdən balıqlar tələf olub.
***
Xəzər dənizinin Azərbaycan sahillərində kütləvi halda ölü balıqlar görünüb. Bu barədə görüntülər sosial şəbəkələrdə paylaşılıb.
Hövsan və Türkan qəsəbələrində çəkildiyi iddia olunan kadrlarda çoxlu sayda ölü balıq görünür. Hadisənin səbəbləri məlum deyil.
Avtosfer.az-ın məlumatına görə, Ekologiya və Təbii Sərvətlər Nazirliyindən bildirilib ki, balıqların ölüm səbəbinin müəyyən edilməsi üçün Xəzər Kompleks Ekoloji Monitorinq İdarəsinin mütəxəssisləri tərəfindən əraziyə baxış keçirilib.
"Sudan və balıqlardan nümunələr götürülüb. Aparılacaq analizlərin nəticəsi əldə edildikdən sonra ictimaiyyətə ətraflı məlumat veriləcək", - açıqlamada vurğulanır.
Ekologiya və Təbii Sərvətlər Nazirliyi yanında İctimai Şuranın üzvü, ekoloq Rövşən Abbasovun sözlərinə görə, ilin bu zamanlarında sahillərdə, xüsusilə dayaz ərazilərdə suyun temperaturunun qızması nəticəsində şaquli sirkulyasiyanı qısalır:
"Bu halda oksigen suda daha çox qala bilmir və ayrılır. Bu da balıqların yaşam mühitinə ciddi təsir göstərir. Xəzər dənizinin səviyyəsi son illər sürətlə enir. Bu cür ərazilər artmaqdadır. Balıqların ölümləri bununla bağlıdır".
(oxu.az)
