Təminat və təxliyə yolları qələbəmizdə rol oynadı

Azərbaycan ordusunun qələbəsi son 200 ildə görünməyən bir zəfər kimi tarixə düşdü. Bu qələbədə xalq, ordu və Ali Baş Komandanın rəhbərliyi öz sözünü səngərdə dedi. Biz tarixi qələbəni qazandıq. Bu böyük qələbədə hərbçilərlə ciyin-çiyinə çalışan yol çəkənlərin də xüsusi payı var. Onlar hərbçilərin ardınca, bəzən də onlarla çiyin-çiyinə təminat və təxliyə yollarının çəkilişində böyük fədakarlıq göstəriblər. Gecə-gündüz, qar-çovğun demədən üzərlərinə düşən vəzifənin öhdəsindən uğurla gəliblər və qələbəmizi tam təmin edilməsində rol oynayıblar.
Haqqında söhbət açacağımız qəhrəman yol çəkənlərdən biri də Emin Valeh oğlu Məmmədovdur. O, hansı ərazidə işləyibsə, hər kəs onun haqqında danışır.
Məlumat verək ki, Emin Valeh oğlu Məmmədov 24 yanvar 1986-cı il  Gədəbəy rayonunun Miskinli kəndində anadan olub. Elə həmin kəndin 1 saylı orta məktəbində təhsil alıb. Orta məktəbi müvəffəqiyyətlə bitirdikdən sonra Azərbaycan Memarlıq və İnşaat Universitetinin Nəqliyyat fakültəsinə daxil olub və 2007-ci ildə bakalavr diplomunu, 2009-cu ildə isə magistr dərəcəsini alıb.  2008-ci ildən başlayaraq Azərbaycanda və xaricdə avtomobil yolları və körpülərin tikintisində özünün bilik və bacarığından istifadə etməklə böyük uğurlara imza atıb. Şirkətdə mütəxəssis kimi böyük təcrübə qazanır…
Ali Baş Komandan İlham Əliyevin Qarabağa Qayıdış Dövlət Proqramına start verməsi işğaldan azad edilmiş ərazilərdə canlanma yaradıb. Tikinti, yol çəkilişi və minalardan təmizlənmə kimi qarşıya qoyulan məqsədlərə nail olmaq üçün bu işə mükəlləf olanlar quruculuğa cəlb olunub. E.Məmmədov da layihə rəhbəri kimi quruculuq işinə töhfə verir. O, ilk olaraq Zəngilan Hava Limanının tikintisində fəal iştirak edir.
Bu məqsədlə Müdafiə Nazirliyinin sifarişi əsasında Hərbi təyinatlı təminat və təxliyə yollarının tikintisinə başlanır.
Laçın və Kəlbəcər rayonlarının sərt ərazilərində yerləşən hərbi hissələrə təminat və təxliyə yollarının çəkilməsi plan olaraq onların qarşısında duran ən vacib amillərdən biri olur.
Hərbi təyinatlı yollarla yanaşı, işğaldan azad olunmuş ərazilərdə yerləşən kəndlərin qəbiristalığının yollarını da 4-5-ci dərəcəli yol kimi işləyib hazırlayırlar.
“Qisas” əməliyyatında təminat yolunun rolu
“Qisas” əməliyyatından danışan E.Məmmədov bildirir ki, dəniz səviyyəsindən 3450-3500 metr yüksəklikdə yerləşən hündürlüklər və sərt relyefli ərazilərdə işləmək nə qədər çətin və təhlükəli olsa da, Vətən sevgisi onları bu işdən və məsuliyyətdən çəkindirmədi: “Əksinə, bir az da irəliyə gedərək iqlimi sərt və ərazisi keçilməz olan yerlərdə işimizin öhdəsindən uğurla gəlməyə nail olmuşuq. Bu, bizim vətəndaşlıq borcumuz idi.  Bizim işimiz əsasən hərbi təyinatlı olsa da, əlavə olaraq digər işlərin görülməsində də səfərbər olmuşduq. Dəniz səviyyəsindən 3450-3500 metr yüksəklikdə sərt iqlim şərairində işləmək böyük fədakarlıq tələb edirdi. Hərbçilər öndə onların arxasında isə bizlər, daima irəliyə getmişik. Bu birlik qələbəmizin təmin olunmasında mühüm rol oynayıb. Dağılmış kəndlərin giriş-çıxışındakı çətinlikləri yerindəcə aradan qaldırmışıq”.
Qar və çovğunda 24 saat çalışdıq
“Elə anlar olurdu ki, qışın sərt gecələrində işimizi davam etmək məcburiyyətində qalırdıq”, – deyən layihə rəhbəri əlavə edib ki, Laçın-Kəlbəcər yolunun Ermənistanla şərti sərhədə yaxın olan hisəsində böyük çətinliklə üzləşiblər: “Hətta bir dəfə xəbər verildi ki, dağın zirvəsində keşikdə dayanan hərbçilərin təminat çatışmazlığı yaranıb.  Hərbi kalon yolda qalıb. Biz dərhal hərəkətə keçdik. 24 saat çalışdıq. Qar və çovğun bizi qorxutmadı. Yollardakı qar kütləsini təmizlədik və əsgərlərin yanına yetişdik. General Münasib Babayev də bizimlə birlikdə idi. Şaxta o qədər güclü idi ki, texnikalar çətinliklə hərəkət edirdi. Yolu görmək mümkün deyildi. Həmin gecəni biz orada qaldıq. Çovğun və qasırğadan xilas olub nəhayət, yolu açmağa nail olduq. Əsgərlərin təminatı verildi, hərbi kalonu çətinlikdən qurtardıq”.
“Sarıbaba ” yüksəkliyinə yol çəkdik, generallar da bizimlə birlikdə idi
Bütün çətinliklərə baxmayaraq, təminat və təxliyə işlərini davam etdirən layihə rəhbəri növbəti yol çəkilişindən danışır: “Sarıbaba” yüksəkliyinə təminat yolunun çəkilişini heç vaxt yadımdan çıxara bilmirəm. Relyef  qorxulu, iqlim sərt idi.  Biz dərhal bütün texnikaları işə cəlb elədik. Dağlıq və sıldırım relyefi olan bu yüksəkliyə yolu ancaq təcrübəli yol işçiləri çəkə bilərdi. Ancaq bu çətinliklər bizləri heç vaxt işimizdən çəkindirmədi. Biz təminat və təxliyə yolunun çəkilişinə başladıq. Bu işdə bizə hərbçilər də köməklik edirdi. Qısa vaxt ərzində bu işin öhdəsindən gəldik.  Bu təminat yolu MN-nin general heyətinin xoşuna gəlmişdi və bizim əməyimizi təltiflərlə qiymətləndirldi. Generallardan Kərim Vəliyev, Anar Kərimov, Vasif Kazımov, Hilal Nəcəfov və Münasib Babayev yolların çəkilişinə birbaşa nəzarət edir, məsləhətlərini verirdilər. Bütün bunlar bizim gördüyümüz işlərin nə qədər əhəmiyyətli olduğunu bir daha göstərirdi.
MN-nin baş qərərgah rəisi  Kərim Vəliyev “Sarıbaba” yüksəkliyinə çəkdiyimiz yolla bağlı bizi fəxri fərman və digər mükafatlatla təltif  etdi. Hətta MN-nin təsis elədiyi qol saatı ilə mükafatlandırıldıq”.
“Böyük işıqlı” dağ yüksəkliyi uğrunda gedən döyüşlərdə əsgərlərlə çiyin-çiyinə idik
Daha bir yüksəkliyə çəkilən yol barədə çətinliklərdən söz açan E.Məmmədov bildirir: “Döyüş gedə-gedə biz də sərt qayalarla savaşır, əsgərlərimizə təminatı vaxtında çatdırırdıq. Bunu qürur hissi ilə qeyd eləmək istəyirəm. Azərbaycan əsgərindən güclü əsgər yer üzündə yoxdur. Əsgərlərimiz sərt qayalarla, sıldırımlarla irəliləyərək erməniləri qovur, biz isə onların arxasınca yolları çəkirdik. “Qaragöl” istiqamətində də təminat və təxliyə yollarını çəkdik. 12-13 sentyabr  2022-ci ildə hərbçilərimiz həmin yüksəkliyi ermənilərdən təmizlədi, biz də yolları çəkdik. 19-20 sentyabr 2023-cü ildə 24 saatlıq lokal antiterror əməliyyatında da bizim texnikalar mənim rəhbərliyim altında təminat və təxliyyə yollarının çəkilişi və maneələrin aradan qaldırılmasına cəlb olunmuşdu. Çox şükürlər olsun ki, bu şərəfli işin də öhdəsində uğurla gəldik. Sevinirik ki, Qarabağın azad olunmasında az da olsa, bizim də əməyimiz olub. Bizlər vətənə təmənna güdmədən xidmət eləmişik. Bu xidmətimizlə həmişə qürur duyacağıq”.
E.Məmmədov deyib ki, Azərbaycan Qarabağ Əlilləri, Veteranları və Şəhid Ailələri cəmiyyəti tərəfindən medallarla təltif edilib.
“Qarabağa Böyük Qayıdış” dövlət Proqramı çərçivəsində Ağdamda işlərimizi davam etdiririk. Ağdam ərazisində ikinci faza yaşayış massivinə yolların çəkilməsi kimi qarşımızda böyük tapşırıqlar qoyulub, – deyə layihə rəhbəri qeyd edib.
Ağdamda böyük tikinti işlərinin aparılıdığını deyən E.Məmmədov xatırladb ki, cənab Prezident İlham Əliyevin göstərişinə əsasən 2025-ci ildə Ağdama qayıdış təmin olunacaq: “Qeyd edim ki, yolların çəkilişi və əhalinin rahat gediş-gəlişinin təmin edilməsi bizim əsas vəzifəmizdir. Bu məqsədlə artıq işə başlamışıq. İşimizi sevə-sevə görürük. Çünki illərdir həsrətində olduğumuz torpağımıza qayıtmışıq.
Qisasımızı almışıq. Allah Ali Baş Komandan başda olmaqla əsgər və zabitlərimizi qorusun. Şəhidlərimizə rəhmət diləyir, qazilərimizə cansağlığı arzulayıram”.
Subut Mehdiyev