Səudiyyə Ərəbistanı nəhəngi “Əl-Hilal”ın və Braziliya millisinin ulduz hücumçusu Neymar Mayamidə okean sahilində torpaq sahəsi alıb.
Arena.az bu barədə “CentreGoals” dərgisinə istinadən məlumat verir.
Mənbənin məlumatına görə, “Ney” torpaq sahəsinin alınmasına 26 milyon avro məbləğində xərc çkib.
Xatırladaq ki, daha əvvəl mətbuatda, braziliyalı ulduzun, bir vaxtlar onunla “Barselona”da birlikdə çıxış etdiyi argentinalı ulduz hücumçu Lionel Messi və uruqvaylı ulduz hücumçu Luis Suaresin çıxış etdiyi “İnter Mayami”yə keçə biləcəyi ilə bağlı məlumat yayılmışdı. Neymarın Floridada daşınmaz əmlak aldığı da bildirilirdi.
Eyni zamanda, mətbuat Neymarın artıq 2025-ci ilin yayında doğma klubu “Santos”a keçəcəyi barədə razılığa gəldiyini də yazıb.
Neymar “Santos”un məzunudur. “Ney” 2009-2013-cü illərdə Braziliya klubunun əsas komandasında çıxış edib. Bu müddət ərzində Neymar “balıqlar”ın heyətində 225 oyuna çıxıb, 136 qol və 64 məhsuldar ötürmə ilə fərqlənib.
Xatırladaq ki, braziliyalı futbolçu ötən il DÇ-2026-nın seçmə mərhələsi çərçivəsində Braziliya millisinin Uruqvay yığmasına qarşı keçirdiyi oyunda (0:2) ağır zədə alaraq, dizinin çarpaz bağlarını yırtmış və bu səbəblə cərrahi əməliyyat edilmişdi. “Ney” ötən həftə Asiya Çempionlar Liqasının “Əl-Ayn”a qarşı oyununda nəhayət ki, yaşıl meydanlara qayıdıb.
Avropada debütü “Barselona” ilə başlamış Neymar daha sonra Kataloniya klubunu öz isətəyi ilə tərk edib. 2023-cü ilin yayında, PSJ-də 6 il keçirdikdən sonra Neymar “Əl-Hilal”a keçib. Tərəflər arasında sonradan 1 il uzadılmaq imkanını özündə ehtiva edən, müddəti 2025-ci ilin iyun ayının sonuna qədər nəzərdə tutulmuş müqavilə imzalanıb. Transfer ərəblərə 90 milyon avro məbləğə başa gəlib. Bu məbləğ Neymarın təxmin edilən bazar qiymətindən dəfələrlə bahadır.
Təcrübəli hücumçu ötən mövsüm “Əl-Hilal”ın heyətində bütün yarışlarda cəmi 7 oyuna çıxıb, 1 qol vurub, 3 məhsuldar ötürmə verib.
Neymar 2010-cu ilin avqustunda debüt etdiyi Braziliya yığmasının heyətində 128 oyun keçirib, 79 qol vurub, 58 məhsuldar ötürmə verib.
“Transfermarkt” internet-portalı 32 yaşlı hücumçunun transfer dəyərini 30 milyon avro məbləğində qiymətləndirir.
Xatırladaq ki, Neymarın ötən gecə Asiya Çempionlar Liqasının “İstiqlal”la (Tehran) ev oyununda (3:0) zədələndiyi məlum olub.
