19 yaşadək futbolçulardan ibarət Azərbaycan millisinin (U-19) baş məşqçisi Elxan Abdullayev İslandiyaya qarşı keçirdikləri oyunu şərh edib.
Arena.az xatırladır ki, U-19 millimiz ötən gün Avropa çempionatının (AÇ-2025) seçmə mərhələsi çərçivəsində ilk oyununu keçirib.
7-ci qrupun 1-ci turu çərçivəsində Moldovada keçirilmiş oyun yığmamızın 0:2 hesablı məğlubiyyəti ilə yekunlaşıb. Azərbaycan yığmasının baş məşqçisi Elxan Abdullayev oyundan sonra AFFA-nın rəsmi saytına açıqlamasında bunları söyləyib:
“Yaxşı təşkil olunmuş komandaya qarşı oynadıq. Matçın əvvəlində bir neçə səhvə yol verdik və qol buraxdıq. İkinci hissədə təşəbbüs tamamilə bizim tərəfimizdə idi. Rəqibin gücünə baxmayaraq, qol imkanlarında onları xeyli üstələyirdik. Məğlubiyyətin əsas səbəbini yaranan şansları qola çevirməməyimizdə görürəm. İki qol buraxsaq da, vəziyyəti dəyişə bilərdik. Lakin yetərincə qol imkanlarını dəyərləndirə bilmədik”.
Baş məşqçi qarşıdakı matça 3 xal qazanmaq üçün çıxacaqlarını söyləyib: “Növbəti rəqibimiz İrlandiya millisidir. Birinci oyunda uduzmağımıza baxmayaraq, hələ də şanslarımız qalır. Qarşıdakı görüşdə sona qədər vuruşacağımıza inanırıq. Üç xal bizim üçün çox önəmlidir və meydana məhz bu məqsədlə çıxacağıq”.
Qeyd edək ki, U-19 millimizin İrlandiya ilə oyunu noyabrın 16-da Moldovanın paytaxtı Kişinyovda yerləşən “Zimbru-2” stadionunda keçiriləcək. Qarşılaşmaya Bakı vaxtı ilə saat 14:00-da start veriləcək.
