Almaniya İqtisadi İşlər Nazirliyi dövlət idxal terminallarına Rusiyadan mayeləşdirilmiş təbii qazın (LNG) tədarükündən imtina etməyi tapşırıb.
Yenicag.az xəbər verir ki, bu barədə nüfuzlu “The Financial Times” departamentin bəyanatına istinadən məlumat yayıb.
Qəzet yazır ki, Almaniya İqtisadiyyat Nazirliyi redaksiyaya daxil olan və noyabrın 6-da göndərdiyi məktubda “Deutsche Energy Terminal”a planlaşdırılan çatdırılma barədə məlumat verildikdən sonra “Rusiyadan təbii qazın heç bir tədarükünü qəbul etməməyi” əmr edib.
Nazirlik qeyd edib ki, sərəncam üstün ictimai maraqları qorumaq üçün verilib və operatoru sonrakı xəbərdarlığa qədər Rusiya təbii qazından imtina etməyə çağırıb. Həmçinin İqtisadiyyat Nazirliyi məktubunda qeyd edib ki, bu cür tədarüklərə icazə verilməsi və terminalların yaradılması Almaniya və Avropa İttifaqının (Aİ) Rusiya qazından müstəqilliyinin təmin edilməsinə zidd olacaq.
Məktubda deyilir ki, Almaniya Rusiyanın Ukraynaya hücumundan sonra Rusiyadan təbii qazından idxal etməyib və nazirliyin göstərişi “bunun dəyişməz qalmasını təmin edir”.
Qəzet xatırladıb ki, Rusiyanın 2022-ci ildə Ukraynaya genişmiqyaslı işğalından əvvəl Almaniya Avropada Rusiya qazının ən böyük idxalçısı idi. İyun ayında isə Aİ Rusiyanın mayeləşdirilmiş qazına qarşı sanksiyalar tətbiq edərək, Rusiya təbii qazının üçüncü ölkələrə daşınması üçün Aİ qurğularından istifadəni qadağan edib.
Noyabrın 8-də məlum olub ki, Avropa Komissiyasının sədri Ursula fon der Leyen ABŞ-nin yeni seçilmiş prezidenti Donald Trampla telefon danışığı zamanı Rusiyadan idxalı azaltmaq üçün Amerika maye qazının idxalını artırmaq ideyasını irəli sürüb.
Rafi Müslümov
