Bakı, 19 sentyabr, AZƏRTAC
Azərbaycan Stolüstü Tennis Federasiyasının prezidenti Şahin Mustafayevlə Avropa Stolüstü Tennis Birliyinin icraçı prezidenti Pedro Migel Moura arasında görüş keçirilib.
Qurumdan AZƏRTAC-a verilən məlumata görə, görüş zamanı Azərbaycanda stolüstü tennis idman növünün hazırkı vəziyyəti və gələcək planlar barədə məlumat verilib, qarşılıqlı əməkdaşlıq imkanları müzakirə olunub.
Bu cür görüşlərin əhəmiyyətindən söz açan ASTF-nin prezidenti Şahin Mustafayev, beynəlxalq idman qurumu ilə sıx əməkdaşlığın stolüstü tennisin inkişafına mühüm töhfələr verəcəyini vurğulayıb. Azərbaycanda dövlət tərəfindən idmanın inkişafına xüsusi diqqət göstərildiyini deyən ASTF-nin prezidenti bu qayğı sayəsində beynəlxalq arenalarda böyük uğurların qazanıldığını və ölkəmizin dünyanın idman mərkəzlərindən birinə çevrildiyini qeyd edib.
Dəvət üçün təşəkkürünü bildirən Pedro Migel Moura isə Azərbaycanda stolüstü tennisin inkişaf strategiyasını və gələcək perspektivini yüksək qiymətləndirərək, yaxın gələcəkdə ölkəmizdə bu idman növü üzrə beynəlxalq yarışların təşkil olunacağına da ümid bəslədiyini bildirib.
